Алисон Бекер повеќе не е најскап светски голман. Приматот на Бразилецот меѓу стативите на Ливерпул го презеде Кепа Аризабалага (23) од Атлетик Билбао за кого Челзи ќе плати 80 милиони евра, пишуваат највлијателните медиуми во Шпанија и во Англија. Потегот на „сините“ од „Стемфорд бриџ“ е последица на извесниот трансфер на Тибо Куртоа во Реал Мадрид, па мораа експресно да реагираат со оглед дека до крај на преодниот рок остануваат уште неколку дена.
„Марка“ пишува дека се часови во прашање до преселбата на Куртоа од Челзи во Реал Мадрид. Официјализирање на соработката на „кралевите“ со Белгиецот се очекува најдоцна до утре, а од Пиринеите на Островот ќе замине Аризабагала кој во изминатите две години прерасна во еден од најдобрите шпански голмани и на кого Баскијците ќе заработат вистинско богатство.
Рекордер летово стана Алисон Бекер. Бразилецот ја напушти Рома и му пристапи на Ливерпул за 70 милиони евра, а „волчицата“ за него ќе добие и дополнителни пет милиони преку бонуси. Неполн месец подоцна Аризабалага стана нов најскап голман во светот, а желба на Челзи е што поскоро комплетирање на трансферот за да може да дебитира веќе во недела против Хадерсфилд во воведното коло од новата сезона во англиската Премиерлига.