Светската здравствена организација (СЗО) денеска предупреди дека можеби никогаш нема да има сигурен лек за Ковид-19, иако сите се надеваат на спасоносна вакцина против вирусот со кој се заразија десетици милиони луѓе.
„Моментно немаме конечно решение за вирусот и можеби никогаш нема ниту да има“, предупреди генералниот директор на СЗО, Тедрос Аданом Гебрејесус.
Гебрејесус и директорот на СЗО за итни програми, Мајк Рајан ги повикаа сите нации строго да ги спроведат здравствените мерки како што се носење на маски, одржување на физичка дистанца, миење на раце и тестирање.
„Пораката до луѓето и владите е јасна: Направете сè“, рече Гебрејесус на брифинг во Женева.
Тој рече дека маските треба да станат симбол на солидарноста ширум светот. Рајан, пак, апелира дека земјите со висок степен на трансмисија на коронавирусот, меѓу кои се Бразил и Индија, треба да водат голема битка.
„Излезот е долгорочна и постојана посветеност“, истакна тој.
Претставниците на СЗО изјавија дека тимот за истражување на СЗО, кој бил испратен во Кина од каде потекнува вирусот, сè уште не се вратил. Гебрејесус, исто така, ги повика мајките да продолжат со доење на своите деца и ако имаат Ковид-19, затоа што придобивките значително го надминуваат ризикот од зараза.