Новак Ѓоковиќ со совршен настап против Доминик Тим се пласира во финалето на Мастерсот во Рим. Во, можеби, најдоброто издание во 2017 година, Србинот го декласира Австриецот со 6:1, 6:0 и закажа дуел со Александар Зверев за тенискиот трон во италијанската престолнина. Неколку часа претходно тој го совлада и Хуан Мартин дел Потро во четврт-финалето што беше прекинато поради дожд во петокот навечер.
„Не постои сомнеж дека мечот со Тим е мој најдобар во оваа година. Можеби и подолг период наназад. Што да кажам освен дека одиграв совршено. Направив се што сакав. Бев задоволен и среќен во секоја минута што ја минав на терен“, рече Ѓоковиќ по пласманот во финале.
А, во мечот за титулата го чека противник со кој нема играно досега. Двете победи во еден ден во голема мера ја кренаа самодовербата кај него, го вратија чувството на супериорност и потсетија на деновите во кои владееше со светскиот тенис. Но, она што е најважно е најавата за драстичен подем во играта за разлика од Мастерсот во Мадрид, а пред вториот гренслем во сезоната – Ролан Гарос.
„Формата е постојано во нагорна линија. Не дојде одеднаш. Мислам дека играв добро и во Монте Карло, па и во Мадрид, но како одминува време, се чувствувам сè подобро на терен. Достигнувањето на ова ниво е процес што се надевам дека ќе продолжи. Ќе дадам максимум за освојување на титулата. Во изминатите десет месеци го загубив задволството кога играм, сега тоа чувство се враќа“, најави српскиот тенисер.
Во женското финале ќе се пресметаат Елина Свитолина од Украина и Романката Симона Халеп.