Новиот градоначалник на Загреб, Томислав Томашевиќ, од зелено-левичарската коалиција Можеме!, изјави синоќа дека гордо ќе го предводи градот кон подобра иднина, барајќи од граѓаните трпение, бидејќи „промените нема да бидат брзи“. Во вториот круг на локалните избори што беше одржан вчера, 39- годишниот Томашевиќ освои речиси двојно повеќе гласови од противкандидатот од десното Татковинско движење, музичарот Мирослав Шкоро.
– Со гордост ќе го поведам градот кон подобра иднина и ќе бидам градоначалник на сите граѓани, и на оние за кои бев избор и на оние за кои не бев избор, рече Томашевиќ по победата, од изборниот штаб во Загреб.
Државната изборна комисија објави дека Томашевиќ освои 65,25 проценти или 199. 630 гласови од граѓаните на Загреб, а Шкоро 34,75 проценти или 106.300 гласови.
Томашевиќ ги повика граѓаните да учествуваат заедно со Можеме! во донесувањето одлуки за развој на градот.
-Нашиот поглед не оди само до следните избори, туку оди многу подалеку во иднината, бидејќи ни е клучна долгорочната благосостојба на нашиот град, потенцира Томашевиќ.
Градоначалник на Сплит во наредните 4 години ќе биде Ивица Пуљак од партијата Центар, Осиек ќе го води Иван Радиќ од Хрватската демократска заедница, а најмногу гласови во Риека доби Марко Филиповиќ од Социјалдемократската партија.
Во вториот круг учествуваа по двајца кандидати кои во првиот круг освоија најмногу гласови.