По најавата за оставка од Зоран Заев, имаме политичка нестабилност што може да предизвика и поширока дестабилизација. Во вакви ситуации е исклучително значајно да преовлада разумно и рационално однесување, да не се наруши стабилноста, институциите да функционираат, да се опстои на евроинтеграцискиот пат и да се одржува внатрешната меѓуетничка кохезија, смета лидерот на Демократски сојуз (ДС), Павле Трајанов.

Клучно е да се обезбеди меѓупартиски консензус за излез од оваа состојба, преку формирање на преодна Влада и организирање на парламентарни избори. Најавите дека има 61 пратеник за пад и избор на нова политичка Влада не се сигурни и можни се пресврти. Само пред некој ден, претставници на партиите од парламентарното мнозинство дадоа беса, вклучително и претставникот на Беса, дека остануваат во парламентарното мнозинство, но еве тие истите го сменија ставот, изјави Трајанов за Нова ТВ.

Зоран Заев, смета Трајанов, мора да дејствува поодлучно или да си поднесе оставка или јавно да објави дека и натаму останува премиер кој ќе се обиде да го стабилизра парламентарното мнозинство.

„Неговата оставка ќе предизвика ист ефект и пад нa Владата преку интерпелација и избори“, заклучи лидерот на ДС за Нова ТВ.