Белата куќа објави видео порака во која претседателот Доналд Трамп ја објаснува неочекуваната одлука да ги повлече американските војници од Сирија.
– Победивме против Исламската држава. Време е нашите војници да се вратат дома, истакна Трамп.
Официјални американски претставници вчера соопштија дека Трамп ќе ги повлече од Сирија сите две илјади американски војници. Според локалните медиуми, одлуката за повлекување предизвикала лутина и огорченост кај републиканските пратеници. Според некои извори, шефовите на Министерството за одбрана и воени команданти до последен момент се обидувале да го одвратат претседателот да ја донесе одлуката. Изненадувачкото објавување победа над ИД е во спротивност со проценките на неговите експерти за ситуацијата во Сирија.
Во своето обраќање Трамп подвлекува колку е тешко да пишуваш писма и да им се обраќаш на блиските на оние кои загинале во борби.
– Сега сите тие се враќаат, веднаш се враќаат, изјави тој.
Висок владин претставник изјави дека одлуката за повлекување на американските трупи е заснована на верувањето на Трамп дека американските војници во Сирија немаат друга задача освен да се борат против „Исламска држава“, која сега држи околу еден процент од територијата со која владеше кога беше најсилна.
Рускиот претседател Владимир Путин ја поздрави одлуката на својот американски колега Доналд Трамп да ги повлече своите војници од Сирија.
Тој го оцени таквиот потег како правилен, истакувајќи го повторно рускиот аргумент дека военото присуство на САД во Сирија е незаконско, бидејќи не е дозволено од Советот за безбедност на ОН или од сириската Влада.
– Останува да се види дали САД ќе го исполнат својот план, нагласи Путин, потсетувајќи дека Вашингтон повеќе пати ветувал дека ќе го повлече својот контингент од Авганистан, па и понатаму е таму веќе 17 години.
Рускиот претседател се согласи со оценката на Трамп дека џихадистичката група Исламска држава е целосно поразена во Сирија.
Путин предупреди за опасност терористите да се префрлат од Сирија во други земји во соседни региони, како на пример во Авганистан. Тој потврди дека Русија ќе ја зајакне својата база во Таџикистан додека ситуацијата во Авганистан не биде решена.