Претседателот на САД, Доналд Трамп, упати силна критика кон Северна Кореја од Полска за последните тестирања на ракета и рече дека Ким Јонг Ун „се однесувал многу многу опасно“.
„Срамота е што се однесуваат на овој начин. Тие се однесуваат многу, многу опасно и нешто ќе мора да се направи околу тоа“, рече Трамп одговарајќи на новинарско прашање на заедничката прес-конференција со претседателот на Полска, Анджеј Дуда.
Прашан за тоа дали е можна и воена акција против Северна Кореја, Трамп одговори дека „некои многи конкретни механизми“ му се на располагање.
„Кога се однесува за Северна Кореја, не знам, ќе видиме што ќе се случи. Имам многу конкретни механизми за кои размислувам, но тоа не значи дека ќе преземам нешто. Јас не повлекувам црвени линии“, е одговорот на Трамп.
Неговата реакција следи откако Северна Кореја лансираше ракета со меѓуконтинентален дострел во вторникот. Според американските служби, истата би можела да достигне до Аљаска.
Амбасадорката на САД во ОН, Ники Хејли, на специјален состанок на Советот за безбедност при ОН, во средата, предупреди од можни воени акции како последица на тестирањата.
„САД се подготвени да ги употреби сите свои механизми за да се одбраниме себе и нашите сојузници“, рече таа, дополнувајќи дека сепак не сакаат да употребат сила.
Таа ги повика Кина и останатите економски сојузници на Ким Јонг Ун да воведат санкции и да го смират врховниот лидер на оваа држава.
Трамп денеска попладне заминува од Полска во Германија, каде што на самитот на Г20 ќе се сретне лично со претседателот на Русија, Владимир Путин.