Новоизбраниот претседател на САД, Доналд Трамп, преку социјалната мрежа Твитер се огласи по повод протерувањата на администрацијата на Барак Обама на 35-те руски оперативци од САД за наводните сајбер-напади за време на претседателските избори.

– Брифингот на разузнавачките служби за таканареченото „руско хакирање“ е одложен за в петок, можеби за добивање време за изградба на случајот. Многу чудно, напиша Трамп на Твитер.

Ова следува откако американските служби заклучија дека Русите извршиле хакирања за време на кампањите и изборите, а за што Трамп постојано тврдеше дека Москва не е вмешана. Овој брифинг тој го најави уште минатата недела, а рече дека овој вторник или среда тој ќе соопшти информации кои другите ги немаат.

Но, како што пишуваат американските медиуми, главните луѓе на службите немале закажано брифинг со Трамп до денес, бидејќи ниту актуелниот претседател Барак Обама се уште не бил брифиран во детали за случајот.

Неодамна, претседателот Обама избрка 35 руски оперативци од САД со образложение дека учествувале во сајбер-нападите врз Демократскиот национален комитет и други гранки на партијата од каде што тој и Хилари Клинтон доаѓаат.

Веднаш потоа, Доналд Трамп повика земјата да се фокусира на поголеми работи, а откако рускиот претседател Владимир Путин реши, како противмерка, да не избрка ниту еден американски дипломат, Трамп го пофали за неговата совесност.

Дополнително, самиот се пофали дека знае многу за хакирањето, и тоа било тешко да се докаже, така што можеби не стои Русија зад истите.

Русија вчера повторно цврсто негираше дека е вмешана во било какви внатрешни работи на САД.