Американскиот претседател Доналд Трамп денес изјави дека решението со две држави, односно признавањето на палестинската државност во Обединетите нации, е „награда“ за палестинското милитантно движење Хамас, додека ги обвини членките на НАТО дека ја финансираат војната на Русија во Украина со купување руска нафта.
Во своето обраќање пред Генералното собрание на Обединетите нации, Трамп повика на прекин на огнот и крај на конфликтот во Појасот Газа, но изјави дека признавањето на палестинска држава „би било награда за ужасни злосторства“, во време кога Хамас „одбива да ослободи заложници или да прифати прекин на огнот“, пренесуваат западните медиуми.
Како да го охрабрат продолжувањето на конфликтот, некои од членовите на ова тело сакаат еднострано да признаат палестинска држава.
Наградите би биле преголеми за терористите на Хамас, за нивните злосторства“, рече Трамп.
Изјавите на Трамп се директен одговор на вчерашното соопштение на неколку европски земји за признавање на палестинската држава за време на самитот на Генералното собрание на ОН.
Наместо да попуштат пред барањата на Хамас за откуп, оние кои сакаат мир треба да бидат обединети околу една порака – ослободете ги заложниците сега, само ослободете ги заложниците, рече Трамп.
Тој додаде дека војната во Газа мора веднаш да престане.
Мора веднаш да ја запреме војната во Газа. Мора да ја запреме. Мора веднаш да преговараме. Мора да преговараме за мир. Мора да ги вратиме заложниците, нагласи Трамп.
Американскиот претседател обвини некои членки на НАТО дека ја финансираат војната на Русија во Украина со тоа што продолжуваат да купуваат руска нафта.
Но, неоправдано е што дури и земјите од НАТО не престанаа да увезуваат големи количини руска енергија и руски енергетски производи. Тие финансираат војна против себе. Тие купуваат нафта и гас од Русија додека се борат против Русија. Срамно е“, рече Трамп, пренесува Ројтерс.
Тој рече дека Соединетите Американски Држави се подготвени да воведат серија царински тарифи за Русија ако не се постигне договор за прекин на војната.
Но, за да бидат ефективни тие тарифи, европските нации, сите вие што сте се собрале овде, би морале да ни се придружите во усвојувањето на токму истите мерки, рече Трамп.