Грчки ПАОК би можел да заврши кај дисциплинските органи во Европската фудбалска асоцијација (УЕФА) поради истакнување на порака со политичка содржина на своите навивачи. „Црно-белите“ на нивниот стадион „Тумба“ во Солун играат против Ајакс во првиот меч од третото квалификациско коло за Лигата на шампиони, а долж првиот ред на трибината спроти централната е истакнат транспарент на кој е испишано „Македонија е една и единствена и овде е“ со сонцето од Вергина на обете страни од написот.
Останува да видиме дали овој дел од кореографијата на домашните навивачи ќе влезе и во бележникот на делегатот што ќе значи и поведување на дисциплинска постапка и парична казна за грчкиот клуб. Од УЕФА постојано ги повторуваат заложбите дека нема место за политиката во спортот и во многу наврати досега е покажана нулта толеранција кон таквите и слични истапи на фудбалските стадиони.