На 8 септември ќе се одржи 33. Охридски атлетски маратон што традиционално се трча по повод Денот на македонската независност. Патеката долга 30 километри ќе води од Свети Наум до Охрид, а новитет од оваа година е воведување и на штафетна трка во три делници по десет километри. Првата измена ќе биде кај селото Трпејца, втората кај населбата Лагадин по што натпреварувачите ќе продолжат до крајната точка на кејот „Македонија“.

Пријавувањето за годинешниот Охридски атлетски маратон е започнато и ќе трае до 5 септември. Подигнувањето на стартните пакети е закажано на 7 септември во салата во СРЦ „Атина Бојаџи“. Котизацијата за сите учесници на маратонската трка е 900 денари и за штафетната трка изнесува 2.250 денари.

Охридскиот атлетски маратон е со меѓународен карактер и една е од најстарите атлетски манифестации на овие простори. Маратонот во континуитет се одржуваше од 1976 година до 1993 година. Почна како настан од локален карактер и со текот на годините се трансформира во републичка, сојузна, државна и меѓународна трка што бележи и постојан пораст на број учесници.

Иницијативата за Охридскиот атлетски маратон е на Живко Стојчевски, кој во 1976 година со помош од тогашната спортска асоцијација „Софка“, го организираше првото издание со само четворица учесници од Охрид. Стојчески беше дел од нив, победи и до денес е најтрофеен учесник на маратонот.

Охридскиот атлетски маратон редовно се одржуваше до 1993 година и беше организиран на 7 Ноември како спортски настан по повод Денот на ослободувањето на Охрид. По пауза од 10 години, а по иницијатива на покојниот проф. Влатко Димитров и други членови од сегашниот организационен одбор, во 2004 година беше возобновен со што продолжи традицијата на оваа голема атлетска трка.