Грчкиот премиер Алексис Ципрас по средбата со претседателот на Европската комисија, Жан Клод Јункер изјави дека Грција за првпат на толку решителен начин се обидува да најде заемно прифатливо решение за прашањето за името со гаранции дека ќе има конечно решение.
Говорејќи за улогата на Грција во ЕУ и регионот, грчкиот премиер на прес-конференцијата во премиерската палата, рече дека земјата покажа во последните години дека треба да игра централна улога во обидот Европската унија во иднина да ја надгради нејзината меѓународна и регионална улога како сила на мир, стабилност и безбедност.
Грција, според Ципрас, ова го покажала преку справувањето со бегалскиот проблем и провокациите од Турција во Егејското море, со обидите за решавање на кипарското прашање, со градењето иницијативи во регионот за европската перспектива на Западен Балкан, но и со напорите за решавање на спорот со името.
– Ова го покажуваме обидувајќи се, по првпат, на толку решителен начин да најдеме заемно прифатливо решение во прашањето со името на поранешната југословенска Република Македонија со гаранции дека ова прашање ќе има конечно решение, рече грчкиот премиер.
Изјавата на Ципрас доаѓа еден ден по последната рунда преговори на шефовите на дипломатиите на Македонија и на Грција, Никола Димитров и Никос Коѕијас и медијаторот на ОН, Метју Нимиц, вчера во Виена.
По средбата медијаторот Нимиц не откри повеќе детали, и само кусо истакна дека имале интензивна дискусија во која двете страни покажале меѓусебна почит.
– Двете страни се посветени на постигнување решение и процесот ќе продолжи во следните недели, изјави Нимиц.
Министрите Димитров и Коѕијас по средбата не дадоа изјави за медиумите.
Македонскиот премиер, Зоран Заев во интервју за бугарската телевизија БТВ коментирајќи ги разговорите за прашањето за името, изјави дека многу е важно да не бидеме обезличени дома, да не бидеме обесчестени,
Прашан за тоа кое име е најприфатливо, Заев не прецизира, но посочува дека ако се гледа од историски аспект денешната македонска држава го зазема горниот, северен, вардарски дел од Македонија, како што еден дел има Бугарија, а еден дел е во Грција.
– Делот од историска Македонија што е во Бугарија, ние го признаваме како бугарски и тука нема никакви дилеми. Ние го нарекуваме Пирински дел, бидејќи Пирин е најголемата планина, но таму живеат граѓани на Бугарија од кои некои се чувствуваат како Македонци и тоа е нивно право. Ние со тоа немаме никаков проблем, вели Заев.
Во контекст на евроатланската интеграција, која засега е блокирана од Грција поради прашањето за името, премиерот вели дека разговорите за спорот продолжуваат со цел да се најде решение.
– Ако не успееме, веројатно нема да имаме иднина во ЕУ и НАТО. Тогаш ќе треба Европа да ја доведеме во Скопје, во Македонија. Не гледам друга опција. Во краен случај ако не се најде решение, прашањето ќе остане отворено и ќе продолжиме по три, шест месеци повторно да бараме одговор, вели Заев за БТВ.