Црна Гора од денес станува полноправна членка на НАТО.
Церемонијата се одржува во Вашингтон а домаќин ќе биде државниот потсекретар Томас Шанон, соопшти Стејт Департментот на САД.
Црногорскиот премиер Душко Марковиќ ќе ги предаде на инструментите за придружување.
На церемонијата присуствува и генералниот секретар на НАТО Јенс Столтенберг. Потоа, на 7 јуни, црногорското знаме ќе биде истакнато на влезот на седиштето на НАТО во Брисел.
“Членството на Црна Гора ќе биде придонес за поголема интеграција, демократски реформи, трговија, безбедност и стабилност за сите негови соседи. Членството во НАТО ќе потврди исто така дека за другите кандидати, кои сакаат и се способни да ги направат бараните реформи за постигнување на високите стандарди на НАТО и да ги прифатат ризиците и одговорностите како и придобивките од членството, вратата на НАТО останува отворена”, соопшти американскиот Стејт Департмент.
Црна Гора, НАТО и Русија
Овој развој на настаните не им се допаѓа на Русите. Така, рускиот сенатор Алексеј Пушков пред неколку дена на Твитер напиша дека “воената вредност на Црна Гора е рамна на нула”.
Но сите не го делат овој став. Срѓан Вучетиќ од кандскиот Центар за меѓународна политика, овој настан е од голема стратешка и политичка важност. Тој за БФМ телевизијата изјави дека од аспект на Кремљ, “секој добиен поен на НАТО е загубен поен за Русија”.
Со Црна Гора НАТО добива контрола на целиот Јадран. Алијансата и понатаму е присутна на Косово и во Босна и Херцеговина и “подготвена да интервенира доколку дојде до нови конфликти”, вели Јануш Бугајски од американскиот Центар за европска политичка анализа.
Накусо, НАТО го контролира практично целиот регион. Недостасуваат уште Србија, која најави дека не сака влез во НАТО, и Македонија чиј што влез беше блокиран во 2008 година поради спорот со името со Грција. Со доаѓањето на новата влада на СДСМ во Македонија повторно се подгрева надежта дека Македонија би можела да влезе во НАТО и без конечен договор со Грција.
Во октомври минатата година, црногорската полиција уапси група српски граѓани и ги обвини за обид за државен удар за да се спречи влезот во НАТО. Подгорица верува дека во оваа група имало двајца руски разузнавачи што наведува на руска поддршка за државниот удар. Но Русија ги демантираше овие обвинувања.
Може ли Русија да и освети на Црна Гора?
Москва сепак има начин да и се освети на Црна Гора и веќе почна да и става економски “сопки”.
Во април Русија блокираше увоз на црногорско вино за 1.7 милиони евра. Но, Подгорица добро знае дека трговската размена со ЕУ изнесува 450 милиони евра па оттука Црна Гора одлучи да и се придружи на ЕУ во санкциите против Москва.
“Ние не зависиме ниту од Русија ниту од Србија. Ние следиме наш пат кон ЕУ и НАТО без разлика дали тоа ним им се допаѓа”, вели црногорскиот економист Драган Петровиќ.
Доколку Русите одлучат да и прават штета на Црна Гора по влезот во НАТО, тоа најлесно би било направено преку туризмот. Според црногорските статистики, во Црна Гора третината туристи доаѓаат од Русија. Русија пролетва ја обвини Подгорица дека спроведувала “анти-руска хистерија”.