Published: Friday, October 29, 2021 08:49
Индустријата за канабис во САД, и покрај глобалната пандемија, е во пораст. Продажбата во минатата година достигна 20 милијарди долари, оваа година е 26 милијарди, а се предвидува дека ќе се зголеми на 45,9 милијарди во 2025 година, јави „Си-Ен-Ен“, повикувајќи се на податоци од „Марихуана Бизнис Дејли“ (МБД).
Продажбата од речиси 46 милијарди долари ќе ја направи индустријата за канабис поголема од индустријата за занаетчиско пиво, рече извршниот директор и претседател на МБД, Крис Волш.
Големите продажби во САД не треба да бидат изненадување, бидејќи повеќето Американци моментално живеат во држави каде што некој облик на канабис е легален. Според Националната конференција на државни законодавства, повеќе од две третини од американските држави го легализирале медицинскиот канабис, а 18 го легализирале канабисот за таканаречена рекреативна употреба.
Во последните 12 до 18 месеци, податоците покажуваат дека продажбата на американскиот пазар продолжила да се забрзува со рекордно темпо, особено во Колорадо, во Вашингтон и во Орегон.
Се проценува дека минатата година имало 320.000 работни места со полно работно време во индустријата за канабис, во споредба со 234.700 во 2019 година.
Меѓутоа, американската Администрација за храна и лекови (ФДА) допрва треба да издаде официјални упатства за тоа како канабиноидите добиени од коноп, како што е ЦБД, може да се вклучат во комерцијални производи.