Македонската фудбалска репрезентација одигра 0:0 против Турција во пријателски меч во Скопје како добра добра увертира пред дуелот со Шпанија во сабота на „Телеком арена“ во квалификациите за СП 2018. Велиме добра од, барем, четири причини. Првата е продолжување на низата без пораз во сите три настапи во 2017 година, втората се однесува на мрежата што мирува во сите 270 минути, третата е што „црвено-жолтите“ беа подобар ривал на теренот и создадоа многу повеќе шанси за гол и, конечно, четвртата што сето ова дојде против селекција која е 100 и кусур позиции повисоко рангирана на ФИФА листата.
„Жалам што не успеавме да дадеме гол. Мораше да се случи како круна на подобрата игра, на иницијативата и на доминацијата. За сето останато можам да упатам честитки до фудбалерите. Недостасуваше само реализација за задоволството да биде комплетно. Но, и вака е присутно од играта, од желбата, од залагањето освен од резултатот“, коментира македонскиот селектор Игор Ангеловски по средбата.
Турција беше зрела за пораз по 15 години од последното гостување во Скопје. Фаворизираните гости на хартија не покажаа зошто се 25 светска фудбалска сила во светот, беа бледи, безидејни и повеќе стихијни одошто организирани. Домашните, пак, одговорија соодветно на предизвикот во двете насоки. Стабилни во одбрана, добро подвижни во среднот ред, поконкретни во напад за целосно неутрализирање на противникот.
„Да се игра на домашен терен пред празни трибини, а притоа на гости е дојдена репрезентација која е меѓу најдобрите во светот е поразително. Играме во Скопје како да сме гости. Знам дека стадионот ќе биде полн во сабота за Шпанија, но не знам зошто не добиваме поддршка и во, условно речено, помалите мечеви. А, мислам дека оставаме репрезентативен впечаток со игрите на последните натпревари“, коментира напаѓачот Илија Несторовски.
Показател за добрата партија на Македонија се и приликите за реализација. Имаа и два поништени гола на Мојсов во 19 минута и на Алиоски во 53 минута, закани преку Пандев и Несторовски во првото полувреме, на Алиоски во второто и зицер ситуација очи во очи во 88 минута што Тричковски не успеа да ја претвори во гол. За разлика од нив, турските фудбалери, речиси, и да не упатија закана кон Столе Димитриевски.
Македонија – Турција 0:0
Стадион: „Телеком арена“ во Скопје. Гледачи: 6.000. Гл. судија: Станислав Тодоров. Асистенти: Дијан Валков и Георги Дојнов (сите тројца од Бугарија). Ж. картони: Ристовски, Спировски (Македонија); Ајхан, Сејинчи, Мор (Турција).
Македонија (формација 3-5-2): Димитриевски – Ристевски, Шиков, Мојсов – Алиоски, Хасани (Трајковски 63′), Спировски (Трајчевски 90’+1′), Стјепановиќ, Ристовски (Тошевски 81′) – Пандев (Тричковски 71′), Несторовски (Ибраими 83′). Селектор: Игор Ангеловски.
Турција (формација 4-2-3-1): Бабакан – Којбаши (Калдирим 46′), Сејинчи, Ајхан, Генул – Туфан, Чолак (Јилмаз 79′) – Сахан (Инан 46′), Туран (Тосун 62′), Мали (Мор 62′) – Унал (Ундер 46′). Селектор: Фатих Терим.