„Резервите на гас на Црното Море се доволни за покривање на светската побарувачка за природен гас во период од 45 години“, изјави заменик-претседателот на турската владејачка Партија на правдата и развојот (АКП), поранешниот премиер Бинали Јилдирим.

„Резервите на природен гас во Црното Море се проценуваат на 540 милијарди кубни метри. Ова е само почеток, ќе откриваме  гас и понатаму. Црното Море може да ги покрие потребите за гас во светот за 45 години“, рече Јилдирим, пренесува турскиот портал „Созџу“.

Турските власти објавија во 2020 година дека во Црното Море се откриени големи резерви на гас.Залихите на најголемиот депозит Сакарија тогаш беа 400 милијарди кубни метри, пренесува Танјуг.

Турскиот министер за енергетика и природни ресурси Фатих Донме во интервју за мајскиот магазин Критер вели дека ова поле се планира да започне со работа на почетокот на 2023 година и дека планот е дневното производство на гас да се зголеми на 40 милиони кубни метри.

„Имаме намера да започнеме со производство на гас. Најверојатно во првиот квартал од следната година. Во почетната фаза дневното производство на гас ќе биде 10 милиони кубни метри. И во рок од три до четири години, планираме да го зголемиме обемот на 40 милиони кубни метри дневно. Значи, ќе расте и годишниот обем на производство на гас“, рече министерот.