Ги чекаме извештаите на домашните истражители и на германските форензичари и тие ќе бидат инпут во конечната одлука за (не)прифаќање на оставките на министерот и на заменик министерот за здравство и на директори на Клиничкиот центар во Тетово, истакна премиерот и претседател на СДСМ, Зоран Заев во вечерашниот ТВ дуел со првиот човек на ВМРО-ДПМНЕ, Христијан Мицкоски на тема „Трагедија во Тетово – одгоровност или политички поени“.

Во Тетово нѝ се случи страшна трагедија, огромна загуба. Оставките се поднесени од морални причини, но сакам да ги знам деталите од истрагата на домашните и на странските експерти пред носење на конечната одлука. Станува збор за министер и заменик министер кои дадоа голем придонес во досегашниот тек на пандемијата на ковид-19 што сè уште не е завршена и со која ќе се соочуваме и во наредниот период, рече Заев.

Мицкоски возврати дека трагедијата во Тетово, во која загинаа 14 човечки животи, е резултат на неспособноста на надлежните и со лошото менаџирање на системот.

Ги слушнавте ли криците на тие луѓе што гореа во Тетово? – Тие отишле по здравје, а ги вратија во поинаква состојба. Премиерот треба да ги прифати оставките, возврати Мицкоски.

На тоа, Заев му реплицира на Мицкоски дека е „срамота да се користи тетовската трагедија во функција на политички поени“.

Не може некој да жали повеќе, некој помалку, рече првиот човек на СДСМ и македонската Влада.

Премиерот притоа објасни за производството на модуларните контејнери, за причината поради која биле поставени (избегнување на италијанско сценарио), итн. Лидерот на опозицијата, пак, ги спомена измените на Законот за градење од 24 ноември во 2020 година и побара одговори за начинот на кој се поставени модуларните контејнери и забележа дека наместо употребна дозвола, биле подигнати со решение за примопредавање, запраша дали имало елаборат за нивно поставување, план за противпожарна заштита, итн. и на крајот побара одговорност.

Заев на тоа „испали“ кон Мицкоски дека „тропа глупости од ракав“, дека модуларните контејнери биле поставени целосно законски, а непотребата од употребна дозвола ја образложи дека објектите биле од времен карактер.