По неодамнешните одржани маневри, Русија остави бројни единици недалеку од границата со Украина и нивниот број сега изнесува 90.000, објави денеска украинското Министерство за одбрана.
Руските вооружени сили во последниот период одржаа серија на бројни воени вежби во кои учествуваа бројни армиски родови, вклучувајќи падобранци, наведува Министерството и додава дека по обуките останале единици на 41-та армија кои се наоѓаат на 260 километри од границата.
Треба да се истакне дека Руската Федерација периодично користи пракса на префрлување и акумулирање на воените единици за одржување на тензии во регионот и политички притисок врз соседните земји, се наведува во соопштението на Министерството за одбрана на Украина, пренесува „Ројтерс“.
Пролетва, Москва го алармира Киев и западните престолнини со распоредување на повеќе од 100.000 војници долж границата со Украина, но подоцна ги повлече по бази.
Речиси 1.000 воени возила кај градот Јелња
Министерството на Украина во понеделникот ги негира медиските наводи дека Русија трупа единици на границата, велејќи дека не е забележано зголемување на силите, ниту на бројот на парчиња оружје.
Американски „Политико“ објави дека во понеделникот е направена снимка со комерцијален сателит што ги потврдува неодамнешните извештаи за повторно трупање на руски воени единици и опрема на границата со Украина.
Сателитските снимки на американската вселенска компанија „Максар Технолоџис“ покажаа околу 1.000 воени возила кај рускиот град Јелња кој се наоѓа на 250 километри северно од границата со Украина.
Кремљ ги отфли овие наводи, а денеска објави дека Русија одржува воено присуство на сопствена територија за каде и да смета дека е неопходно.