Реал Мадрид со победа го почна походот кон одбрана на титулата во Лигата на шампиони на УЕФА. Успешна увертира и за Манчестер сити, за Тотенхем, за Бешикташ и за Шахјтор во воведното коло што донесе и рекорден број на погодоци (54) на отворањето на сезоната. Двојни стрелци во „второто полувреме“ од првото коло беа Кристијано Роналдо, Хари Кејн и Џон Стоунс. Но, одиме по ред.
Двата меча во групата Е завршија со поделба на бодовите. Ливерпул одигра 2:2 на „Енфилд“ против Севилја за крај на европската победничка низа на „црвените“ на домашен терен што траеше шест меча. Гостите од Андалузија го отворија и резултатот со головите на Бен Једер во петтата минута и Кореа во 72., во меѓувреме реализираа Фирмињо во 21. и Салах во 37. за екипата на менаџерот Јирген Клоп.
Дамјан Бохар, пак, спречи пораз на Марибор во првиот натпревар во групна фаза во ЛШ по пауза од пет години. Фудбалерот со еден настап за „змајчеки“ се запиша во листата на стрелци во 85 минута за поништување на водството на московски Спартак од 59. минута што го обезбеди Самедов за конечни 1:1 на „Људски врт“ во Љубљана.
Џон Стоунс, изненадувачки, се промовира во главен лик на Манчестер сити на гостувањето кај Феенорд. Централниот дефанзивец потпиша половина од головите на „граѓаните“ во триумфот над холандскиот состав со 4:0. Во другата половина учествуваа Агеро и Габриел Хезус за израмнување на најубедливата победа на тимот од „Етихад“ во елитното натпреварување.
Шахтјор го пречека Наполи на стадионот на Металист во Харков и славеше со 2:1. Тајсон во 15 минута и Фереира во 58 минута „стрелаа“ за комотна предност на тимот од Доњецк што наполитанците само ја ублажија до крајот преку Милик во 72 минута од пенал.
Изненадување приреди Бешикташ со победата на „Драгао“ против Порто со 3:1. Талиска во 13 минута, Тосун во 28. и Бабел во 86. го совладаа Икер Касилјас, почесниот за Португалците беше автоголот на Тошиќ од 21 минута.
Лајпциг ремизира (1:1) со Монако на „Ред Бул арена“ во премиерниот меч на бундеслигашот во ЛШ. Форсберг во 33 минута осигура предност за домашните што ја анулира Тилеманс во наредната минута.
Кристијано Роналдо продолжи од каде што застана во миатата сезона. Португалецот стигна до бројката од 107 гола во шампионската Лига со двата што го прослави против АПОЕЛ во победата на „Сантијаго Бернабеу“ со 3:0. Мрежата на Кипраните ја затресе и Серхио Рамос во 61 минута.
Двоен стрелец беше и Хари Кејн во триумфот на Тотенхем над Борусија Дортмунд со 3:1. Добрата голгетерска форма на англискиот репрезентативен напаѓач дојде до израз во 15 минута и во 60., со реализација за спарси учествуваше и Сон Хунг Мин во четвртата минута. Јармоленко во 11 минута беше стрелец на единствениот за „милионерите“ во првиот нивни пораз по 13 средби.
Лига на шампиони
Група Е
Ливерпул – Севилја 2:2
Фирмињо 21′, Салах 37′ – Бен Једер 5′, Кореа 72′
Марибор – Спартак Москва 1:1
Бохар 85′ – Самедов 59′
Група Ф
Феенорд – Манчестер сити 0:4
Стоунс 2′, 63′, Агеро 10′, Габриел Хезус 25′
Шахтјор Доњецк – Наполи 2:1
Тајсон 15′, Фереира 58′ – Милик 72′ (п)
Група Г
Порто – Бешикташ 1:3
Тошиќ 21′ (автогол) – Талиска 13′, Тосун 28′, Бабел 86′
Лајпциг – Монако 1:1
Форсберг 33′ – Тилеманс 34′
Група Х
Реал Мадрид – АПОЕЛ 3:0
Роналдо 12′, 51′ (п), Рамос 61′
Тотенхем – Борусија Дортмунд 3:1
Сон Хунг Мин 4′, Кејн 15′, 60′ – Јармоленко 11′