Ливерпул по четврти пат го освои Суперкупот на УЕФА. Фудбалерите на актуелниот европски шампион беа подобри пеналџии од колегите од Челзи, актуелни владетели на трофејот во Лига Европа, во мечот на „Водафон арена“ во Истанбул и по 1977, 2001 и 2005 година се враќаат на „Енфилд“ со европскиот пехар за кој традиционално се игра на почетокот на секоја сезона.
Ливерпул и Челзи постигнаа по гол во основнииот дел на натпреварот. Оливие Жиру погоди во 36. минута за „сините“ од „Стемфорд Бриџ“, Садио Мане возврати за „црвените“ од „Енфилд“ во 48. минута. Мрежите мируваа до продолженијата, а во нив идентичен расплет – по гол на обете страни. Садио Мане со својот втор гол на средбата во 95. минута реализира за водство на Ливерпул на што Челзи одговори шест минути подоцна по ударот на Жоржињо од белата точка.
https://www.youtube.com/watch?v=XQcG26cBMJc
Победник во Истанбул немаше и по дополнителните пола час игра, па пеналите решаваа новиот Суперкуп титулар. За Ливерпул погодија сите пет изведувачи (Фирмињо, Фабињо, Ориги, Александер-Арнолд и Салах), за Челзи беа непогрешливи Жоржињо, Баркли, Маунт и Емерсон, но не и Абрахам чиј удар го одбрани Адриен и „сините“ останаа на единствениот пехар во натпреварите од ваков тип од 1998 година.
Мечот на Босфорот по многу нешта беше историски. За првпат за Суперкуп трофејот играа две англиски екипи, за првпат се играше во Истанбул, а Французинката Стефани Фрапар беше прва жена што судеше натпревар за УЕФА титула во машка конкуренција.