Европската фудбалска асоцијација (УЕФА) одговори позитивно на барањето на Вардар да биде домаќин на Копенхаген на „Телеком арена“ во Скопје во третото квалификациско коло за Лигата на шампиони. Но, гестот го услови со промена на редоследот на мечеви поради Суперкуп спектаклот меѓу Реал Мадрид и Манчестер јунајтед на 8 август. Па, наместо во гости, „црвено-црните“ ќе бидат домаќини во првата средба на 25 јули (20 ч.). Реваншот е во ист термин на „Паркен“ стадионот на 2 август.
Реакција на македонскиот првак и одлуката на УЕФА, сепак, да дозволи натпревар на единствениот фудбалски објект што ги исполнува строгите стандарди пред претстојниот Суперкуп доаѓа по слабата организација при гостувањето на Малме во Струмица и бројните забелешки што се најдоа во извештајот на делегатот. Згора на тоа, стадионот „Младост“ е одобрен за организација на мечеви до второ коло квалификации, но не и за трето.
Токму поради низата пропусти што беа нотирани при гостувањето на шведскиот претставник во ЛШ, вардарци се предадени на дисциплинска во Нион. Случајот против нив се базира на пет точки и тоа за фрлање на тврди предмети од навивачи, за користење на пиротехника, за недолични скандирања, за притисок врз официјални лица и непроодност или блокирање на скалилата на централната трибина на струмичкиот стадион. Висината на казната за управата на „црвено-црните“ ќе биде позната на 28 јули.