Репрезентативната пауза во домашното првенство не промени ништо на подобро во екипата на Работнички која и пред неа беше западната во резултатска криза. „Црвените“ од Градски парк загубија од Вардар со 0:2 во дербито на 24. коло во македонската Прва лига што е трет пораз во низа за нив, па некој мораше да понесе одговорност. И како што е пракса во најважната споредна работа во светот, први на удар во такви ситуации се тренерите. Исклучок не е ниту Жикица Тасевски кој по поразот поднесе неотповиклива оставка на кормилото на дебармаалци.

„Поднесов неотповиклива оставка бидејќи клубот се наоѓа во ситуација што е неприфатлива за мене. Резултатски не бевме најдобри и тоа треба да се признае. Кој го познава денешниот фудбалски поредок, тоа, секако, ќе го разбере. Сакам да се заблагодарам на претседателот Драган Поповски и на директорот Иван Поповски за довербата и условите за работа ги овозможуваат. На сите во клубот им посакувам многу среќа во продолжение на првенството, а јас ќе бидам најсреќен ако моето заминување биде пресвртница за нови успеси што се достојни за клуб каков што е Работнички“, порача Тасевски на заминување од Градски парк.

Работнички моментно е шести на табелата со 31 бод. Во последните пет првенствени меча има само еден триумф (против фенерџијата Победа со 1:0), едно реми (против Силекс 1:1) и дури три пораз (од Академија Пандев 1:2, од Шкендија 0:1 и од Вардар 0:2). Во наредното коло, во недела, дебармаалци ќе гостуваат во Ѓорче Петров на екипата на Македонија, но излезот во Европа се чини е невозможна мисија за нив во оваа сезона и покрај драстичното освежување на тимот во зимскиот преоден рок и подготовките во Анталија.

Прва лига, 24 коло

Работнички – Вардар 0:2

Силекс – Шкендија 0:3

Ренова – Беласица 3:2

Шкупи – Македонија Ѓ.П. 0:1

Победа – Академија Пандев (одложен за 1 мај).

Табела: Шкендија 53, Вардар 45, Академија Пандев 42 (-1), Ренова 33, Шкупи 33, Работнички 31, Македонија Ѓ.П. 29, Силекс 24, Беласица 19, Победа 18 (-1).

Идно коло (31 март): Македонија Ѓ.П. – Работнички, Шкендија – Победа, Беласица – Шкупи, Академија Пандев – Ренова, Вардар – Силекс.