Државниот празник (114 години од Илинденското востание) и православниот (чествувањето на „Свети Илија“), фудбалерите на Вардар ќе се обидат да го претворат и во фудбалски празник за себе, за клубот, за навивачите и за целокупната јавност. Вечерва (20 ч.) на „Паркен“ во Копенхаген низ возвратните 90 минути со истоимениот домаќин ќе треба да докажат дека се созреани за предизвик и притисок во натпревар чиј влог е пласман во плеј-офот за Лигата на шампиони. Имаат 1:0 од Скопје, резултат што најдобро се негува со избалансирана игра во двата правца наместо со ориентирање кон одбрана на сопствениот гол.
„Копенхаген е квалитетен тим. Да не се залажуваме. Тоа што победивме во Скопје дојде како резултат на наша добра игра. Со таква намера и дојдовме во Данска за наши нови квалитетни 90 минути во обид да излеземе како севкупни победници во двомечот со данскиот првак и, секако, да отвориме нова страница во клупската историја“, коментира Бобан Грнчаров.
Вардаровиот капитен е согласен дека дефанзивата не е опција за елиминација на Копенхаген. Потребна е, вели тој, и демонстрација на храброст и сила за закана кон противничкиот гол како единствен начин за премостување на данскиот ривал. Дека се кадарни за тоа, „црвено-црните“ ставија до знаење на „Телеком арената“, а со пресликан пристап и настап денеска да покажат дека играта и триумфот во Скопје не беа случајност.
„Не смееме да се повлечеме и да мислиме само на одбрана на резултатот. Така би оставиле многу простор за фудбалерите на Копенхаген да тргнат по нивната цел. Подготвени сме за ова што нè очекува, свесни сме дека стадионот ќе биде полн и навивачите ќе бидат голема поддршка меѓутоа атмосферата ќе биде мотив и за нас. Треба да бидеме трпеливи, концентрирани, да нападнеме и, по можност, да дадеме гол. Ако реализираме ќе бидеме многу блиску до севкупна победа во двомечот“, дополни Грнчаров.
Копенхаген го наслови реваншот со Вардар како еден од најважните натпревари во сезоната. Клубот упати отворена порака до фановите да го исполнат „Паркен“ до последно место и да бидат 12 играч на данската екипа за пробивање до плеј-офот во ЛШ. За нивно привлекување во што поголем број и „подмачкување на грлата“ организира т.н. „трето полувреме“ за дружење и загревање пред натпреварот со многу пиво (првите 100 литри беспатни) и храна како подготовка за посакуваното славје. Дали вардарци ќе успеат да ги нарушат победничките планови на домаќините ќе биде познато нешто пред 22 часот.
Победникот од македонско-данскиот двомеч ќе продолжи во плеј-офот за Лигата на шампиони, како последно коло пред фазата по групи, како утеха за елиминираниот состав ќе биде трансфер во плеј-офот за УЕФА Европа Лигата.
Лига на шампиони/квалификации/3 коло/реванш мечеви
АПОЕЛ – Виторул (0:1)
БАТЕ Борисов – Славија Прага (0:1)
ЦСКА Москва – АЕК (2:0)
Истанбул Басакшехир – Бриж (3:3)
Копенхаген – Вардар (0:1)
Викторија Плзен – ФЦСБ (2:2)
Јанг Бојс – Динамо Киев (1:3)
Хафнарфјордур – Марибор (0:1)
Лудогорец – Хапоел Бер Шева (0:2)
Ајакс – Ница (1:1)
Легија Варшава – Астана (1:3)
Олимпијакос – Партизан (3:1)
Риека – Салцбург (1:1)
Розенборг – Селтик (0:0)
Во заграда се резултати од првите средби.