Името на Горан Грујевски во јавноста беше споменувано многу ретко. Началникот на Петтата управа во МВР, човек од доверба на поранешниот директор на тајната полиција, Сашо Мијалков, беше на безбедно се до објавување на „бомбите“ од опозицијата. Тогаш неговиот лик излезе од анонимност, а веќе денеска еден од недопирливите шефови од УБК ќе оди во притвор.
Началникот Горан Грујевски во годините додека управувал со тајната полиција и според обвинението на СЈО незаконски прислушувал илјадници граѓани, ја пишувал својата докторска дисертација на тема: „(Зло) употреба на посебните истражни мерки“, а ја одбранил во 2014 година на Правниот факултет „Јустинијан Први“. Докторот на науки, кој во својот труд објаснува како и кога според закон смее да се прислушуваат граѓани, сега е обвинет во случаите „Таргет“ и „Тврдина“. Грујевски во „Таргет“ се товари дека уништувал документација поврзана со прислушувањето, а во случајот „Тврдина“ е обвинет за уништување на системите за прислушување.
Главен обвинет во „Таргет“ е неговиот шеф, Сашо Мијалков, но тој нема да оди во притвор. Мијалков, како надреден на Грујевски ќе се гони за злосторничко здружување со цел нелегално прислушување, но тој ќе остане да се брани од слобода. Судот на Мијалков му го одзеде пасошот и тој сега останува „заробен“ во Македонија.
Инаку, Грујевски по втор пат ќе влезе во затворот во Шутка. Првиот пат лани во март остана кратко. По само неколку дена Кривичниот совет во Основниот суд Скопје 1 го преиначи решението на судијата на претходна постапка и мерката притвор ја замени со куќен притвор.
Откако излезе од притвор Грујевски најголем дел од времето беше на боледување и не се појавуваше ни на работа, ниту во Судот, но остана да биде началник на Петтата управа. Беше разрешен лани во јули, а по само неколку месеци, во октомври, тогашниот министер за внатрешни работи, Митко Чавков, го унапреди неколку скалила повеќе и тој беше назначен за помошник директор за координација во МВР. На оваа позиција е се до ден денес.
Дали Грујевски експресно ќе влезе и излезе од Шутка и овој пат, ќе зависи од одлуката на Врховниот суд, кој го има последниот збор доколку обвинетиот одлучи да се жали до судот на Јово Вангеловски.
Освен за Грујевски, мерката притвор е прифатена и за Тони Јакимовски и Никола Бошковски, поранешни вработени во МВР и луѓе од доверба на Мијалков.