Нема никакви показатели дека вакцината влијае на стерилитет, но болеста ковид-19 влијае на репродуктивното здравје – нагласи Маркотиќ.
Крунослав Цапак, директор на Институтот за јавно здравје, на денешната прес-конференција во Владата на Република Хрватска, открива дека многу брзо ќе започне и вакцинирање со трета доза, но на почеток, само за имунокомпромитирани лица. Министерот за здравство, Вили Берош, испрати порака на антиваксерите, изјавувајќи дека дозволува нивно мислење, но да не влијаат на други, пренесува Index.hr.
Берош информираше и колку деца се хоспитализирани во четвртиот бран, со напомена дека тој број е поголем отколку во третиот.
Директорката на Клиниката за инфективни заболувања „Др. Фран Михаљевиќ“ во Загреб, д-р Алемка Маркотиќ, ги објави резултите на истражувањето спроведено врз вработените на Клиниката коишто покажуваат колку се заштитени по втората доза вакцина. Маркотиќ рече дека разни истражувања покажуваат дека прележувањето на ковид-19 влијае врз репродуктивното здравје и на жената и на мажот, но дека нема докази дека вакцината влијае врз истото. Таа додаде и дека, како сега стојат работите, најверојатно, ќе биде потребно вакцинирање против ковид-19 еднаш годишно .
Маркотиќ додава:
– Тоа е многу важно, тоа мислев да го елаборирам наскоро. Ќе покренеме проект, следење на машко и женско репродуктивно здравје. Се забележува дека инфекцијата со ковид-19 може значително да влијае на смрт на плодот (фетусот) и на предвремено раѓање и на последици подоцна. Трудниците почесто завршуваат на интензивна, бебињата, исто така, почесто на неонатолошките оддели. Кај мажите е забележано дека вирусот може да се најде и во тестисите и во ејакулатот.
Во исто време, досега достапните студии за вакцинираните лица не покажуваат ништо од тоа и страшно е такви невистини да излегуваат во јавноста. Нема никакви показатели дека вакцината влијае на стерилитет, но болеста ковид-19 влијае на репродуктивното здравје – нагласи Маркотиќ.