Министерот за здравство, Венко Филипче и неговиот заменик, Илир Хасани до Собранието да ја поднесат оставката, а не до премиерот Зоран Заев. На ова денеска на прес – конференција ги повика лидерот на ВМРО – ДПМНЕ, Христијан Мицкоски. Тој им даде рок од два дена за да ги поднесат своите оставките до законодавниот дом.

– Во вторник е закажана седницата. Доблесно би било од овие двајца, и од министерот и од неговиот заменик, пред седницата да ги достават оставките. Но, доколку тие не ги достават, тогаш пратеничката група на ВМРО – ДПМНЕ ќе достави до спикерот Џафери предлог за разрешување на министерот и заменик – министерот и за тоа ќе побара и поддршка и од другите пратенички групи во парламентот. Доколку истите тие пратенички групи се одлучат да ја дадат поддршката, се добродојдени. Доколку не се одлучат, нека им е со среќа, изјави лидерот на ВМРО – ДПМНЕ, Христијан Мицкоски.

Тој неодамна најави дека секојдневно работи на обезбедување мнозинство во парламентот, а денеска рече дека поддршката ќе зависи од тоа дали ќе добијат поддршка од другите пратенички групи во барањето за разрешување на Филипче и Хасани, доколку самите не си ги поднесат оставките.