Локалните избори дојдоа како еден вид на референдум за оваа влада и нејзините политики. Очекувањата на народот се изневерени и оваа влада на чело со Зоран Заев, која владее со пазарења и измами, мора да падне, порача лидерот на ВМРО-ДПМНЕ, Христијан Мицкоски на денешната прес-конференција на која повтори дека е обебзедено ново парламентарно мнозинство со најмалку 61 пратеник и во кое, покрај најголемата опозициска партија, според него, се и Беса, Алијанса на Албанците, Левица и Алтернатива.

Влегуваме храбро и на страна на народот. Затоа и по локалните избори тргнав по создавање на ново парламентарно мнозинство, а заедничкиот блок на ВМРО-ДПМНЕ, Движењето Беса, Алијансата на Албанците, Левица и Алтернатива е коалиција против криминалите на власта. Мнозинството очекувам да се зголеми. Ќе се обидам да формирам нова влада, но само ако бидам сигурен дека тоа ќе биде кабинет со сериозен кредибилитет. Во спротивно, ако не успеам да осигурам да се постигне таа цел и Влада со полна ефикасност, ќе бараме брзи предвремени парламентарни избори за народот да одлучи за новата иднина, рече Мицкоски од партиската говорница.

Мицкоски одби да даде коментар за постот на лидерот на Левица, Димитар Апасиев кој на Фејсбук напиша дека нема да биде дел од Владата на ВМРО-ДПМНЕ, туку нивната присутност во, според него, новото парламентарно мнозинство е со цел да се помогне за пад на владата на Заев.

Претседателот на ВМРО-ДПМНЕ изрази очекување дека оставката на Заев ќе биде доставена во Собрание до понеделник. Доколку тоа не се случи, вели Мицкоски, ќе ја активира иницијативата за импичмент на актуелниот владин кабинет.