Вчеравечер, недалеку од границата со Белорусија, беше погребан 19-годишниот Сириец, Ахмад Ал Хасан. На погребот, кој се одржа под превезот на ноќта, присуствуваа неколку членови на локалната муслиманска заедница, но не и членови на неговото потесно семејство.
Церемонијата, поради околностите во кои беше извршена, не наликуваше на муслимански погреб. Трошоците ги плати локалната заедница со образложение дека тоа било нивна должност. Телото на Ахмад го пронашле припадници на полската полиција во саботата, а било наведено дека се удавил во реката Буг што ја дели Полска од Белорусија.
Се верува дека покрај Ахмад, во оваа мигрантска криза, која е сè поблиску да кулминира во сериозен меѓународен инцидент, животот го загубија уште најмалку 11 лица.
Во текот на летото, на границата меѓу Белорусија и Полска, се зголеми приливот на бегалци од Блискиот Исток и од Африка кои се обидуваат да стигнат до Западна Европа во потрага по подобар живот. Ситуацијата ескалира на 8 ноември, кога на бариерите се собраа над 2.000 луѓе.
Оттогаш беа направени неколку обиди за пробивање на границата, на што полските безбедносни сили одговорија со фрлање на солзавец и со апсење на повеќето од оние кои ја минаа границата. Потоа, мигрантите спонтано поставиле камп во близина на пунктот Брузги, во регионот Гродно.
Околу 3.500 бегалци од кампот во понеделникот се дислоцираа на контролен пункт и се сместија „точно на граничната линија“, наведува РИА Новости.