Владата на вчерашната седница усвои Одлука за максимален износ на ново задолжување преку издавање државни хартии од вредност на меѓународниот пазар на капитал во износ од 800 милиони евра. Со тоа ќе се обезбедат финансиски средства за буџетска поддршка на Република Северна Македонија во 2020 година и во 2021 година, но и за рефинансирање на обврските кои достасуваат по основ на отплата на државниот долг.
„Имајќи ги предвид сите предизвици што произлегоа по прогласената пандемија на ковид-19 од Светската здравствена организација, мерките за заштита и рестрикција на движење кои ги преземаат државите, а особено нејзиното влијание на пазарите на капитал, Министерството за финансии предложи, а Владата прифати, финансирање со издавање на еврообврзници, кои ќе ја поддржат ликвидноста на државата во време на пандемија, намалена економска активност, преземени мерки за заштита на економијата и работните места на граѓаните, како и зголемените трошоци во секторот здравство“, наведуваат во соопштението на владината прес-служба.
Владиниот кабинет синоќа го усвои и ребалансот на Буџетот за 2020 година, се вели во дописот и се додава дека деталите ќе бидат презентирани на прес-конференција во текот на денешниот ден.
Владата ја разгледа и усвои Информацијата за потребата од назначување агент за процесни услуги на Република Северна Македонија претставувана од Министерството за финансии во процесот на издавање на еврообврзница на меѓународниот пазар на капитал. За таа цел го задолжи Министерството за надворешни работи преку Амбасадата на Република Северна Македонија во Лондон да ја преземе функцијата на агент за процесни услуги во име на Република Северна Македонија претставувана од Министерството за финансии.