Собранието на Република Северна Македонија ја продолжи конститутивната седница сo претрес по предлогот за претседател на законодавниот дом да биде Талат Џафери. Со 62 потписи на пратениците од СДСМ и коалицијата „Можеме“, ДУИ и ДПА, Џафери е предложен за уште еден четиригодишен мандат за собраниски спикер за кого пратениците на ВМРО-ДПМНЕ, на Алијанса на Албанците и Алтернатива и на Левица најавија дека ќе гласаат против.
Бројот на потписи за кандидатурата на Џафери укажува дека во Собранието има мнозинство по договорот на лидерите на СДСМ и на ДУИ за формирање на владина коалиција. Претседателот на Собранието се избира со 61 глас „за“.
Предлогот за претседател на Собранието го образложи пратеникот Изет Меџити од ДУИ, кој кажа дека во минатиот период Џафери „ефикасно и успешно раководел со законодавниот дом, согласно законите и Уставот“. Тој, според Меџити, успешно ги менаџирал сите процеси од надлежност на Собранието.
Пратеничката група на ВМРО-ДПМНЕ нема да го поддржи предлогот Џафери да биде повторно претседател на Собранието. Никола Мицевски од ВМРО-ДПМНЕ своето обраќање го започна со коментар дека со 62 пратеници нема функционалност и стабилна работа во парламентарниот дом и оти вакво Собрание нема „долго да биде“.
„Малиот број на пратенци не дава можност дека овој дом ќе биде функционален и дека ќе работиме како што треба. Предлогот што го доставувате, нема да биде поддржан. Во делот од предлогот во една реченица прочитав дека Џафери во минатиот мандат успешно ги менаџирал сите процеси од надлежност на Собранието“, рече Мицевски.
Тој се наврати на работењето на Собранието во претходниот мандат, кога претседател на Парламентот беше Талат Џафери, посочувајќи на злоупотреби на Деловникот, дека 40 отсто од законите биле донесени по скратена постапка, злоупотреба на уредбите, злоупотреба на европското знаменце и друго.
Јован Митревски од СДСМ реплицираше дека е точно оти од 800 закони, 300 биле донесени по скратена постапка, но дека 90 отсто од донесените закони по скратена постапка биле усогласување на законот за прекршоци со кои се намалуваат казните за граѓаните. Во однос на формирањето на владеачко мнозинство, Митревски рече дека тоа ќе трае четири години и оваа држава ќе оди напред, а претседател на Собранието ќе биде Талат Џафери.
Гордана Силјановска од ВМРО-ДПМНЕ на почетокот на седницата побара доколку Џафери е предлог за претседател на Собранието, седницата да ја води некој од замениците.
„Процедурата е гаранција за демократија. Претседавачот треба да се однесува како претседател, но со оглед на фактот што вие сте предложен за претседател, ќе треба да одредите некој од вашите заменици да ја води седницата“, рече Силјановска. На ова Џафери рече дека седницата може да ја води додека трае претресот и дека во одреден момент ќе повика некој од замениците да претседава со седницата.
Пратеничката Силјановска рече дека Џафери е 19 години на функција, што според неa, е предолго. Политиката, како што кажа, не смее да биде занимање, туку треба да следи по нешто што сте го направиле во животот. Потсети дека функцијата претседател на Собранието влегла во пазарењето меѓу коалициските партнери што е недозволиво.
„Се случи уставните измени да ги брани министерот за надворешни работи, но овде седеа и двајца луѓе од кабинетот на премиерот. Многу други закони се носеа на ваков начин без дебата и затоа јас имам голема резерва кон старо-новиот претседател на Собранието како чувар на Деловникот и на процедурата“, рече Силјановска, која потенцира дека не смее да има грубо кршење на Деловникот и оти мора да се држиме до процедурата.
Таа, сепак, позитивно го оцени потегот на Џафери кој ги потсети актуелните пратеници дел од владата дека со верификацијата на мандатите им престануваат функциите во Владата, но тие, како што кажа Силјановска, ревносно си ги вршат своите функции, спротивно на Уставот, Деловникот и Изборниот законик.
Скендер Реџепи, како претставник на Алијанса за Албанците и Алтернатива исто така кажа дека тие нема да гласаат за Џафери и дека дури и нема да присуствуваат на гласањето за него. Обвини за крадење на албанските гласови од страна на ДУИ и рече дека тие ќе продолжат со демократско делување. Против Џафери ќе гласа и Левица, како што најави нејзиниот лидер Димитар Апасиев од говорницата во Собранието.