Партијата ВМРО-ДПМНЕ апелира институциите да не приведуваат недолжни луѓе брзајќи да покажат некаков резултат од насилството врз пратениците во четвртокот.
– Во текот на вчерашниот ден до партијата допреа информации дека приведени се многу луѓе кои не сториле никакво насилство или кривично дело, а полицијата ги привела, држела со часови во полициска станица, а дел од нив добиле и притвор без елементарен доказ дека сториле кривично дело или насилство. Треба да се разграничи неколкучасовно влегување на граѓани во парламентот, во народниот парламент, заради насобран револт и гнев од предавничките, антидржавни и кукавички политики на СДС, од нанесувањето тешки телесни повреди, се вели во соопштението на ВМРО-ДПМНЕ.
Оттаму потенцираат дека МВР и Обвинителството требало да знаат дека за да приведат или изнесат пред суд некого, треба да имаат цврсти докази за сторено кривично дело.
– Исто така ОЈО и судовите не смеат да имаат различни аршини за овие настани од настаните при насилствата врз полицијата направени од шарените платени протестанти минатата година, кои за пари протестираа и вршеа насилство врз македонските полицајци. Од нашите информации дознаваме дека некои лица добиле и притвори заради вербални деликти, а без извршено физичко насилство. Оттука, апелираме до судот да внимава при носењето на одлуките, и да се држи исклучиво до фактите и доказите и да не ги понесува партиската наклонетост кон едни или кон други, стои во партиското соопштение.
Партијата на Груевски смета дека предизвикувач на „народен бунт“ е токму СДС (СДСМ) која не само што 60 дена ги игнорирала граѓаните кои масовно, упорно, мирно и демократски протестирале, туку и континуирано ги провоцирале со навреди, погрдни зборови, омаловажувања и конечно со незаконски и противиставен обид за избор на претседател на парламентот.
– ВМРО-ДПМНЕ континуирано јавно предупредуваше на ризиците од ваквиот однос на СДС и изборната измама со постизборнито носење на Тиранската Платформа како основа на новата коалиција. Го предупредуваме и министерот во МВР, Нухиу да не врши притисок на вработените во министерството по секоја цена да апсат што повеќе луѓе без основ (со цел да добие политички поени во неговата партија и електорат). Само еден невин уапсен е голем преседан за кој ќе се бара одговорност, доколку се докаже дека бил приведен без основ и докази, стои во пораката од ВМРО-ДПМНЕ.