Драган Ковачки е предлог на ВМРО ДПМНЕ за министер за внатрешни работи во техничката Влада на чие чело ќе биде Оливер Спасовски. Го посочил лидерот на опозициската партија на средбата со Али Ахмети попладнево во Собранието и бил прифатен од првиот човек на интегративците.
По предлогот на Ковачки се очекува конечно изјаснување и од премиерот во заминување, Зоран Заев со кого Мицкоски имаше средба во Владата. Дефинитивен одговор попладнево изостана со образложение дека има време до 3 јануари и дотогаш треба да се провери дали Ковачки може да биде технички министер за внатрешни работи, иако Заев го оцени како спорен и ја повика стручната јавност да се произнесе.
„Има доволно време за одлука до 3 јануари. Не сакам да се предизвикаат реакции во јавноста дека сме постапиле противуставно. Првпат слушам за Драган Ковачки, па затоа и апел до стручната јавност да го провери военото лице од одбраната. Да не се доведеме во ситуација да биде противуставно неговото именување, па и Собранието да донесе непријатна одлука“, рече Заев по средбата со Мицкоски.
Меѓу средбата на Мицкоски со Ахмети со Собранието и со Заев во Владата, на својот Фејсбук налог се огласи и министерката за правда, Рената Дескоска Треноска.
„Покрај толку советници од правен, да пуштиш противуставен предлог?!“, напиша Дескоска на социјалната мрежа.
Дескоска го илустрира постот го илустрира со член 97 од Уставот кој вели – „со органите на државната управа во областа на одбраната и полицијата раководат цивилни лица кои непосредно пред изборот на тие функции биле цивили најмалку три години“.
Ако Ковачки биде прифатлив и за Заев, тоа ќе биде негов прв политички ангажман во кариерата што досега ја градеше како воено лице во АРМ. Поседува чин полковник, како професионалец учествувал во повеќе мисии на НАТО и одликуван е со државни ордени за заслуги.
Тема на средбата меѓу Заев и Мицкоски бил и изборниот модел. Двајцата лидери разговарале за можните варијанти да се изгласа законското решение што ќе важи за наредните избори. Ставот на опозицијата, пак, е прашањето да се остави по изборите, додека Заев сака да го разгледа и со помалите политички партии и додаде дека за истото ќе разговара во наредниот период.