ВМРО-ДПМНЕ не е задоволен од одговорот на портпаролката Маја Коцијанчиќ бидејќи не дала одговор на прашањето врз основа на кој дел од Уставот, ЕУ го советува Претседателот Иванов да определи нов лидер на кој ќе му го додели мандатот.
– Коцијанчиќ само повтори дека е потребен широк консензус и широка коалиција за решавање на престојните предизвици и приоритетните реформи. Госпоѓата Коцијанчиќ веројатно знае дека од 2002 година наваму, во овие речиси 15 години, само од 2011-2014 година, македонската Влада немаше коалиција од двотретинско мнзинство во парламентот. Дури и во тие три години успеваше со дијалог со опозицијата да обезбеди 2/3 за реформските закони особено во судството, и широката поддршка никогаш не беше проблем. Проблемот заради кој не започнаа преговорите со ЕУ, а кој вчера индиректно го спомна е билатералниот спор со Грција. За негово решавање не е потребна широка коалиција во парламентот, туку минимум политичка волја на Грција земјава да се приклучи на ЕУ и пред се поддршка на решението од граѓаните на Македонија на референдум, се вели во соопштението на ВМРО-ДПМНЕ.
Партијата не е задоволна ниту од тоа што не добила одговор за прашањето дали за секое формирање влада во Европа, ЕУ бара на прес конференција широка коалиција.
– Не беше одговорено, затоа што такво нешто не постои. Во земјите во Европа тоа би се толкувало како директно мешање на ЕУ во внатрешните демократски и политички процеси кога некој однадвор јавно би барал кој со кого да коалицира и како да изгледа коалицијата, широка или тесна, реагира ВМРО-ДПМНЕ.
Оттаму им се заблагодаруваат на ЕУ за советот но потенцираат дека одлуките во Македонија ги носат пратениците во Собранието, избрани од народот.
– Ние како најголема партија со најмногу пратеници сметаме дека најдобро решение се предвремени избори и до крај ке се залагаме за истото, потенцира партијата.
Во однос на одговорот кој го добија од Американската амбасада, ВМРО-ДПМНЕ се заблагодарува, констатирајќи дека очигледно било дека не станува збор за официјален став на новата администрација под раководство на Трамп.