Според опозициската партија ВМРО-ДПМНЕ, денешната седница на Комисијата за деловнички и мандатно-имунитетни прашања, на која не присуствуваа членовите на партијата, претставувало седница на партиска комисија на СДСМ, која не покажала достоинство да биде на нивото на обврската која ја има, односно да го заштити Уставот и уставниот поредок на Република Македонија.
– Денешната одлука не е базирана на факти и аргументи, туку е базирана на голата желба за политички реваншизам на СДСМ и кон пратениците на ВМРО-ДПМНЕ и коалицијата, но и кон многу граѓани кои покажале лична доблест и свест да проговорат јавно против политиките на СДСМ. Лишувањето од слобода на пратеници е врвен доказ за непостоење на правен систем и непочитување на Уставот на Република Македонија, се вели во соопштението од Пратеничката група на ВМРО-ДПМНЕ.
Тие сметаат дека со денешната одлука, СДСМ пратил порака дека не сака да постои опозиција на нивното владеење ниту во Собранието, ниту надвор од него.
– Пратеничката група на ВМРО-ДПМНЕ и Коалицијата за подобра Македонија не сака да дава легитимитет на овие противуставни одлуки на партиската Комисија на СДСМ. Денес, Комисијата за деловнички и мандатно-имунитетни прашања го преќути и аминуваше прекршувањето на Уставот и Деловникот за работа на Собранието. СДСМ сака да не постои опозиција во Република Македонија, ниту во Собранието, ниту надвор од него. Тие се спреми да го прекршат Уставот, законите, Деловникот, да ги загрозат основните човекови права, да го нарушат достоинствот и честа на сите кои не мислат како нив, стои во соопштението.
Денешната реакција на ВМРО-ДПМНЕ следи откако Комисијата за деловнички и мандатно имунитетни прашања го одобри барањето на судот да им се одземе имунитетот на шестмината пратеници кои неодамна беа приведени од страна на полицијата за нивното учество во насилствата во Собранието на 27.април.
Пратениците на кои собраниската Комисија денеска донесе одлука да им го симне имунитетот, за што Собранието до сабота треба да даде согласнсост, се Крсто Мукоски, Сашо Василевски, Жаклина Пешевска, Љубен Арнаудов и Јохан Тарчуловски од ВМРО-ДПМНЕ и Љупчо Димовски од СПМ.