Close Menu

Партиски трки за градоначалници: Во фотелја на СДСМ ќе седнат и без книшка, ВМРО анкетира

0
By on ПОЛИТИКА

Во политичките партии почна изборот на кандидати за градоначалници и советници коишто ќе се тркаат на локалните избори во октомври годинава. Во Социјалдемократскиот сојуз јавниот повик е отворен до 30 јуни, па веќе почнале да се одржуваат состаноци во општинските организации на кои паѓаат предлози кои личности да бидат кандидирани за претстојните локални избори. А на повикот може да се јават и оние коишто не се членови на оваа партија. Засега од партиите не откриваат колку од актуелните градоначалници со својот „минат труд“ заслужија пак да бидат ставени на изборните листи за градоначалници, а колку од номинираните ќе бидат сосема нови личности.

НоваТВ дознава дека членови на СДСМ од општината Аеродром вчера се изјаснувале за новите кандидати за градоначалници, па се очекува наскоро да биде соопштено кој ќе биде официјалниот предлог во трката за нов „татко“ на оваа општина.

Од оваа партија изјавуваат:

– Во СДСМ започнаа внатрепартиските постапки за самокандидирање и номинација на кандидати за градоначалници и советници во општините и Град Скопје. Покрај предлозите кои се собираат во Месните одбори, во општинските организации, отворен е и јавен повик на кој може да се пријави секој кој и не е член на СДСМ, а ги дели вредностите и визиите на СДСМ, кој ужива углед во своето место на живеење, секој кој е подготвен да работи за доброто на својата општина и неговите сограѓани – велат за НоваТВ од СДСМ.
Оттаму појаснуваат како понатаму ќе тече  изборот на кандидатите:
– Предлозите потоа се доставуваат до Извршниот одбор на партијата, а оние кандидати кои ќе влезат во потесна селекција ќе бидат проверени и пред граѓаните, преку анкети и истражувања на јавното мислење. СДСМ е постојано на терен меѓу граѓаните, одржуваме граѓански трибини, маалски средби, средби со целни групи каде го слушаме гласот на граѓаните, ги нотираме нивните барања и потреби се со цел заедно со граѓаните да ја создадеме најдобрата понуда за секоја наша општина. Зад таа понуда ќе застане СДСМ и без разлика кој ќе биде кандидатот или кандидатката за градоначалник на која било општина, СДСМ дава збор пред граѓаните дека сè што е дел од програмата,  ќе биде реализирано – нагласуваат од оваа партија.

Од партијата ВМРО-ДПМНЕ ни изјавија дека сè уште не почнале со активности за изборот за предлог кандидати за идни градоначалници.- Во тек се анализи, внатрепартиски процедури и анкети. Така што, во моментов, сè уште нема  одлуки за никаде, ни изјавија од опозициската партија.

Во движењето ГРОМ велат дека подготовките веќе се во тек.
– Ги почнавме разговорите со коалициониот партнер „Обнова за Македонија“,  ама далеку сме од конкретни одлуки и решенија за кандидати за нови градоначалници и советници. Следната недела ќе имаме поконкретни разговори на оваа тема. Сега ние како ГРОМ имаме 15 советници, а немаме градоначалник. Се  надеваме на подобар резултат на претстојните избори – вели  генералниот секретар на ГРОМ, Крсте Петрески.

Премиерот Зоран Заев на својот Фејсбук профил го објави јавниот повик за самокандидирање на кандидати за градоначалници на општините и Град Скопје за претстојните локални избори што ќе биде отворен до 30 јуни.

– Отворени сме за сите кои имаат желба да се вградат во напредокот, да придонесат, да бидат дел од најдоброто. Во СДСМ како демократска, отворена и инклузивна партија има натпревар на идеи и програми, пишува Заев.

А во Дебар деновиве „падна“ и првата кандидатура за градоначалник за претстојните локални избори.

Тоа е актуелниот татко на градот, Хекуран Дука, познат уролог, за што Претседателството на дебарскиот огранок на ДУИ донесе едногласна одлука.

Инаку, од  ДУИ денеска не добивме одговор како течат останатите активности на оваа партија во врска со изборот на нови кандидати за градоначалници.

Максим Димитриевски, Мартин Костовски и Оливер Илиевски веќе обелоденија дека сакаат да се  кандидираат за нов градоначалник на Куманово на локалните избори.

Претседателот на Собранието, Талат Џафери, најави дека летово ќе ги распише локалните избори,  согласно  законските рокови. Редовни избори, според Изборниот законик, треба да бидат распишани во последните 90 дена од мандатот на актуелните градоначалници и советници, но не повеќе од 70 дена пред истекот на мандатот.

Според Џафери, бидејќи на половина од градоначалниците четиригодишните мандати им биле потврдени околу 18 октомври 2017 година, а на избраните во втор круг во почетокот на ноември 2017 година, значи дека на половина од градоначалниците и на безмалку сите совети на општините, мандатите им изминуваат околу 18 октомври оваа година.

Љубица Балабан

Share.