Европскиот парламент (ЕП), по долги преговори помеѓу политичките групи, денес ќе дебатира за ситуацијата во Каталонија.
Барањето за дебата дојде до левите партии и Групата на зелените на кои им се придружија групата на либералите (АЛДЕ) и Партијата на социјалисти и демократи (ПСД). Најголемата европска политичка група Европската народната партија (ЕНП) се согласи да се одржи оваа дебата откако постави свој услов. Условот е да не се разговара за полициското насилство на шпанската полиција за време на референдумот во Каталонија. На оваа моќна политичка група и припаѓа и шпанскиот премиер Мариано Рајох.
Во обид да го спречи референдумот шпанската полиција употреби сила и беа повредени 893 лица.
Барањето за дебата датира од минатата недела, пред референдумот, но до вчера ПСД и ЕНП не се согласуваа на дебата. Сликите на полициско насилство што во неделата дојдоа од Каталонија ги примораа европските пратеници да се согласат на дебата.
“Бараме од Европа да не ги затвора очите пред полициското насилство што го видовме во неделата”, изјави Ска Келер копретседател на Групата на зелените.
За ЕНП, од друга страна, постојат фундаментални принципи што треба да се почитуваат а владеењето на правото мора да се примени и да се почитува, изјавија од оваа политичка група.
Насилството на шпанската полиција во Каталонија го осудија само Белгија, Словенија и Литванија. Останатите земји членки го премолчеа овој скандалозен настан со кој Мадрид се обиде да го спречи одржувањето на референдумот за независност во Каталонија.
Ни Европската комисија (ЕК) не го осуди насилството и се задржа на кус коментар во кој се вели дека насилството нема место во политиката.
Каталонскиот пратеник во Брисел Амадео Алтафаж изјави дека со ова ЕК губи од својот кредилитет.
“Разочарувачки е што портпаролот на ЕК за време на својот редовен брифинг не изусти ниту еден збор за сите оние 893 луѓе што беа повредени. Тие се граѓани на ЕУ. Овде не зборуваме за некоја земја на другиот крај на светот. Тие 893 лица се Каталонци и граѓани на ЕУ”, изјави тој.
Алтафаж е поранешен портпарол на ЕК. Нашата јавност го познава како портпарол на Оли Рен кој беше комесар за проширување од 2012 година до 2014 година.
Каталонскиот пратеник во Брисел изјави дека Комисијата на Јункер е слаба и дека во ЕУ најголеми бенефиции добиваат најголемите земји членки помеѓу кои е и Шпанија.
Претседателот на Каталонија Карлес Пиџдемон на Би-Би-Си денес изјави дека прогласувањето на независноста на Каталонија е прашање на денови во исто време додека шпанскиот крал Фелипе остро ги осуди настаните во Каталонија велејќи дека тие се закана за стабилноста на Шпанија. Ова е втор пат шпански крал да излезе со политичка изјава. Последен пат тоа се случи во 1981 година по падот на диктаторскиот режим на Франко.