Врховниот суд денеска на јавни седници ќе ги разгледува жалбите за притворите на осомничените од настаните на 27 април. Во притвор останаа пратениците Kрсто Mукоски и Сашо Василевски, поранешниот министер за внатрешни работи, Митко Чавков и уште неколкумина осомничени за насилствата во Собранието на 27 април.  Пратениците Љубен Арнаудов, Јохан Тарчуловски и Љупчо Димовски се во домашен притвор, а на Жаклина Пешевска на барање на Обвинителството и беше укинат притворот и заменет со мерки за претпазливост.

Од одлуката на Врховниот суд дали ќе ги укине притворите или не, зависи дали на шестмината пратеници ќе им биде овозможено да се бранат од слобода и евентуално да се вратат на работа со Собранието.

Од Основното јавно обвинителство за организиран криминал и корупција вчера за НОВА потврдија дека е завршена истрагата за настаните од 27 април, минатата година и во моментов течат законските рокови во кои осомничените и одбраната можат да ги прегледуваат списите и доказите и евенттуално да бараат од обвинителството собирање на одредени докази.

-Основното јавно обвинителство за гонење на организиран криминал и корупција ја заврши истрагата за настаните од 27 април минатата година и до осомничените и нивната одбрана достави известување за завршување на истражната постапка. Во моментов тече законскиот рок од 15 дена согласно член 302 од Законот за кривична постапка  кога осомничените и одбраната имаат право да ги прегледуваат списите и доказите, да составуваат препис, да поднесуваат исправи или други докази, списи од дејствијата на одбраната или да бараат од обвинителството собирање на определени докази. По истекот на роковите од чл.302  јавниот обвинител во рок од 15 дена ќе донесе соодветна јавнообвинителска одлука, стои во одговорот на Обвинителството на нашите прашања дали е завршена истрагата за минатогодишните настани во Собранието од 27 април.

Според Законот за кривична постапка рокот во кој јавниот обвинител треба да ги собере доказите што ги предлага одбраната изнесува 30 дена од поднесувањето на барањето.

Ако се земат во предвид законските рокови, обвинение за насилствата од 27 април може да се очекува најрано во текот на мај или почетокот на јуни оваа година.

Апелација пред околу еден месец им го замени затворскиот притвор со куќен на Богдан Илиевски, Борис Дамовски, пратеникот Љубен Арнаудов, Јане Ченто, Иван Цветановски – дел од кабинетот на поранешниот претседател на Собранието, Трајко Вељаноски и на Оливер Радулов од УБК.

Неофицијално, еден од условите на ВМРО-ДПМНЕ за враќање во Собранието, чија работа ја бојкотираат од почетокот на декември, лани, по притворање на пратениците, е комплетирање на нивната пратеничка група.

Неодамна и претседателот на партијата, Христијан Мицкоски изјави оти „се надева и има чувство дека многу брзо математичките и политичките проблеми ќе бидат надминати и ВМРО-ДПМНЕ ќе може да се врати во Собранието“.