Претседателот на Србија, Александар Вучиќ ретерира во најавите за враќање на рестриктивните мерки во борбата против Ковид-19 по синоќешните протести во Белград што резултати со неколку десетици повредени полицајци и демонстранти, оштетени полициски возила, многу солзавец и обид за упад во Собранието. Во денешното обраќање до нацијата, тој рече дека премиерката Ана Брнабиќ и министерот за здравство, Златибор Лончар ќе ги заострат мерките за главниот град, но „полициски час“ од петок попладне до понеделник наутро најверојатно ќе нема. Истакна дека не се согласува со тоа, но дека ќе ги почитува нивните одлуки, какви и да бидат.
„Се плашам дека вака одиме во корист на оние кои сакаат да се додворат на граѓаните, но тоа нема да донесе брзо оздравување. Го почитувам нивниот став“, рече Вучиќ пред новинарите попладнево во Белград.
Вучиќ најави претворање на други болници во Ковид-центри и ги замоли граѓаните да не излегуваат на собири за да нема натамошно ширење на заразата.
„Денешниот ден ни е втор најлош по бројот на новозаразени лица, имаме 357 случаи од 8.600 направени тестови, починаа 11 лица, а 118 се поставени на респиратор. Тие бројки се зголемуваат секојдневно при што Белград ни е најголем проблем. Немојте да одржувате собири со две, три, четири илјади луѓе, бидејќи така ќе се заразите и самите, вашите роднини и соседи. Камењата не се лек за општеството“, порача Вучиќ на прес-конференција во Белград.
Синоќешните протести во Белград ги оквалификува како „најбрутално политичко насилство“, дека собирот бил добро организиран и непријавен, но и дека потфрлиле српските безбедносни служби бидејќи дошло до наплив на „криминален и меѓународен фактор и служби“. Рече дека „демонстрантите брутално ја нападнале полицијата, ја каменувале, удирале, тепале, а тие, сепак, се однесувале достоинствено се додека не била оштетена вратата на Собранието и заземено фоајето. Вучиќ притоа истакна дека се повредени 43 полициски службеници и оштетени пет возила.
Според него, нема сомнеж дека „оние“ кои работеле на организација на протестот имале за цел да ја ослабнат позицијата на Србија. На прес-конференцијата, Вучиќ истакна дека има докази за присуство на претставници на регионални служби меѓу демонстрантите, но затоа ќе говори по анализите на српските безбедносни служби.
„Сите кои учествуваа во палење на автомобили и повредување на полицајци, ќе бидат остро казнети во склад со законот. И тука ќе нема милост“, најави српскиот претседател.
Воедно тој најави постапки и за припадници на полицијата ако се утврди дека ги надминале нивните овластувања.
„Законите постојат за сите, па и за полицајците“, заклучи Вучиќ кој утре ќе отпатува во посета на Париз и на Брисел.