Веселин Вујовиќ не е дел од Светското ракометно првенство во Германија и во Данска. Како селектор на Словенија не успеа до мундијалска виза низ бараж двомечот со Унгарија, но легендата на југословенскиот и светски ракомет и миленик на скопската публика не може да не биде во тек со актуелните случувања. Одлично ги познава приликите од Вардар до Триглав и моментно, во отсуство на клупски и репрезентативни обврски, е ангажиран како стручен коментатор на порталот „Индекс“ и во својата најнова анализа се осврнува на досегашните игри на Хрватска, но и на мечот со Македонија во рамки на третото коло во групата Б.
„Хрватска е многу тежок противник. Македонија е тврда и тактички подобра репрезентација од индивидуално посилната Хрватска. Македонците имаат одличен селектор во Раул Гонзалез кој паметно го штеди клучниот играч, Кире Лазаров во одбрана и наместо него на терен го испраќа Поповски. Двајцата млади ракометари Талески и Кузмановски даваат голем придонес, а Филип Лазаров добро им користи кога имаат играч повеќе. Стојанче Стоилов има специфична тежина за Македонија“, коментира Вујовиќ.
Тој притоа се прашува за начинот на кој Лино Червар и неговите асистенти ќе се определат да се спротивстават на Македонија и дали притоа ќе менуваат нешто во одбрана или ќе одат на нешто поагресивна игра.
„Јас секогаш им говорам на играчите дека треба да научат кога да трчаат, а кога да кочат. Што ни значи брз центар по примен гол. Ајде да сториме се, да не дојде до него“, истакнува ракометната легенда од Цетиње.
Вујовиќ посвети простор за анализа и на хрватската репрезентација, особено на некои моменти на Червар. Притоа издвојува две работи што, добронамерно, ги оценува како негови големи грешки.
„Домагој Дувњак треба да се дозира наместо да се троши пребрзо и лесно што и се прави со него. Лино Червар треба да внимава да не го прави тоа. Без оглед во каква форма е Дувњак, тој, сепак, е еден од најдобрите светски ракометари. Вака, кога без потреба игра премногу и предолго, тогаш подеднакво толку и се троши што може да не биде добро за Хрватска. Червар повторува и една друга работа што ја сметам за негова голема грешка. Прави премалку ротација како во клубовите што ги води, така и во репрезентацијата“, анализира Вујовиќ.
Мечот меѓу Хрватска и Македонија од третото коло во групата Б на СП во ракомет е попладнево од 18 часот во „Олимпијахале“ во Минхен.