Осум и пол години минаа од последната победа на македонската женска фудбалска репрезентација во квалификациски меч за Европско или Светско првенство. Реми (1:1) против Литванија и триумфи над Лихтенштајн (5:1) и на Летонија (1:0) беа мечевите за кои времето ги нагриза спомените. Во досието на националниот тим е запишано дека датираат од март во 2011 година на стадионот „Кукуш“ во Турново во претквалификациите за Европското првенство во Шведска во 2013 година.
Непријатната традиција за „црвено-жолтите“ фудбалерки траеше до денеска. Прекината е попладнево во тренинг центарот „Петар Милошевски“ при Фудбалската федерација на Македонија (ФФМ). Во квалификациите за ЕП 2021 беше совладата селекцијата на Казахстан со 4:1 во меч во кој по два гола постигнаа Наташа Андонова и Гентијана Рочи.
„Чувството е фантастично. Се вративме на победите. Одигравме одличен натпревар за што најдобар показател е резултатот“, гласеше, меѓудругото, коментарот по мечот на Наташа Андонова која од ова лето е член на екипата на Леванте во Шпанија.
Победата над Казахстан е од големо значење за женскиот тим под водство на Кирил Изов за поместување на самодовербата од мртва точка пред саботниот дуел со Србија на домашен терен. Македонската селекција загуби од Австрија (0:3), на почетокот на септември, во првиот меч во групата Г во која е сместена и Франција.