Лидерите на политичките партии и денеска пред граѓаните ветуваа ралични проекти, ако гласачите одлучат на овие избори да гласаат за нив. Покрај многуте ветувања, бројни беа и обвинувањата кои лидерите на четирите најголеми политички партии си ги упатија еден кон друг.
Лидерот на ВМРО-ДПМНЕ, Никола Груевски од Кичево порача дека ќе им помогнат на весниците да опстанат во време во кое ако се нема поддршка од државата тешко се опстојува. Тој најави дека ќе воведат субвенции за весниците.
„Порталите се повеќе добиваат на тежина и значење, весниците се потешко преживуваат. Владата од 2018-та година ќе воведе субвенционирање на весниците по еден правичен критериум кој дополнително ќе биде објавен. Тоа ќе го направи владата која некој ја нарекува недемократска и дека ги гуши медиумите“, рече груевски.
Заев пак од Карпош порача дека вреди што ја објавил вистината за Македонија и го повика лидерот на ВМРО-ДПМНЕ на дуел.
„Ако не може сам Груевски, нека го земе со себе Сашо Мијалков, нека го земе Никола Тодоров, Трајко Вељаноски. Да го прашам тоа што не можев да го пуштам во бомбите, а граѓаните имаат право да го знаат“, изјави Заев.
Лидерот на Демократската партија на Албанците, Мендух Тачи, вечерва одржа митинг во Добри Дол. Тачи го обвини претседателот на ДУИ, Али Ахмети дека на народот му донел само насилство.
„ДПА ќе работи во две сфери, економски и политички проекти. Економски најважно е да нема дискриминаторски буџет, да има правична и пропорционална распределба на буџетот во државата, да има инвестиции во сите места подеднакво. Се залагаме и за закон за амнестија што ќе го донесеме со цел да не лежат во затвор сите осуденици од монтираните политички случаи. Такви ги има многу зошто ДУИ ни донесе насилство, крв и затвори“, рече Тачи.
Демократската унија за интеграција (ДУИ) вечерва претстави дел од кандидатите за пратеници во шестата изборна единица, на собир на тетовските ограноци на партијата, во големата сала на Центарот за култура „Иљо Антесвки Смок“ во Тетово.
Според претседателот на ДУИ, Али Ахмети, Албанците немаат друга алтернатива освен интеграција во ЕУ, бидејќи едногласно се определени да одат напред.
„Ова е наша мисија, се соочивме со многу предизвици и многу луѓе кои не не сакаа, но ги надминавме пречките, сега сме посилни од порано. Борбата продолжува, треба да бидеме свесни дека имаме многу работа. Најважно во новиот мандат е да работиме на подобрување на квалитетот на образованието и нови кадри. Само со знаење и сила можеме да постигнеме многу“, рече Ахмети.