Идејата на ДУИ за прв премиер Албанец е популистичка и партијата сама ќе се загуби во неа, истакна Зоран Заев на денешната прес-конференција на која, меѓу другото, ја коментираше неодамна лансираната идеја на Али Ахмети дека е дојдено време за Албанец на чело на Владата. Дури е здраво за државата, како што рече првиот човек на владеачката партија, ДУИ да замине во опозиција по 17 години членство во Владата. Но, за такво нешто, дополни Заев, сепак одлучуваат граѓаните.

„И за државата е здраво ако ДУИ замине во опозиција по 17 години власт за што, сепак, одлучуваат граѓаните. Би било добро ДУИ да се обиде да освои гласови од Македонците, а ВМРО-ДПМНЕ исто така треба да се обиде да ги освои гласовите на Албанците. Инаку, следниот премиер ќе биде од редовите на СДСМ“, рече Заев.

Заев притоа најави и пријава против ВМРО-ДПМНЕ за, како што рече, предвремен почеток на изборната кампања со делење на промотивен материјал. Тоа, според него е врв на антидржавното однесување на опозицијата.

„Тоа беше нивна карактеристика во изминатите три години, беше нивна карактеристика и во изминатите три месњеци во борбата со коронавирусот. Таквото однесување кулминира со предвремени изборни активности чии членови, активисти и носители на листи за кандидати за пратеници јавно делеа партиски предизборен материјал што е спротивно на законот“, додаде Заев.