Премиерот Зоран Заев во интервју за „Дојче веле“ на македонски јазик ја оцени како историска одлуката на Европската унија (ЕУ) за датум за отпочнување преговори за членство на Македонија и Албанија. Притоа оцени дека консолидацијата на ЕУ ќе биде завршена кога ќе бидат прифатени земјите од Западен Балкан.
Запрашан за различните интерпретации на одлуката на Еврокомисијата оти Владата тврди дека станува збор за историски момент додека критичарите оценуваат дека во прашање е само уште едно одложување и разочарување за Македонија, Заев нагласи оти „не постои друг опис на одлуката освен фактот дека е историска“.
„Добивме датум за преговори – јуни 2019. Дотогаш, заедно со нашите пријатели и партнери од Европската комисија, заеднички ќе работиме на остварување на критериумите, односно на имплементација на фазите од Договорот со Грција и финализација на реформите. Многу сме блиску до нашата цел да ги достигнеме стандардите на ЕУ“, рече Заев.
Истакна дека „според досегашните искуства во проширувањето на ЕУ, поглавјата во просек се затвораат во рок од седум години“.
„Препознати сме како земја со силна политичка волја за решавање на спорови со соседите. Земја која придонесува кон консолидацијата на ЕУ. Остануваме на реформскиот пат. Имаме јасна цел пред нас. Н` останува да ја финализираме нашата последна домашна задача – последната фаза од реформите. Потоа, ќе можеме горди да влеземе низ портите на Европа. Сите оспорувања и критики на оваа голема одлука не можат да погледнат подалеку од партиските или други интереси“, вели Заев.
Прашан колку условената препорака ќе го отежни спроведувањето на договорот со Грција, Заев одговори дека „ќе остане силно посветен до крај“.
„Со сите аргументи што ми стојат на располагање ќе докажувам и презентирам дека Договорот со Грција е историски и дека датумот за почеток на преговори е добро заслужен и ќе биде ефектуиран во јуни 2019 година. Противници се оние политички фактори во земјата кои без никаква аргументација ги негираат придобивките и сакаат да се вратат на авторитарните политики во време кога мнозинството граѓани во нашата земја и во земјите од Западниот Балкан сакаат да им се приклучат на ЕУ и НАТО“, вели Заев.
Прашан дали го загрижува тоа што во Грција постои силен отпор и на коалицискиот партнер на премиерот Алексис Ципрас и на опозицијата за тоа да се прифати „македонска нација“ и „македонски јазик“, како што е наведено во договорот, Заев рече дека „фактот што опозициските партии во двете земји се противат на договорот, покажува дека е постигнат добар компромис“.