Премиерот Зоран Заев, придружуван од министерот за надворешни работи Бујар Османи, денеска беше домаќин на работен ручек во чест на претседателот на Полска, Анджеј Дуда кој е во официјална посета на Северна Македонија.
На средбата, како што информираат од владината прес-служба, Заев изразил благодарност до претседателот Дуда за охрабрувачките пораки што тој ги испраќа по однос на интеграцијата на Северна Македонија во ЕУ, како и за севкупната помош што Полска ја обезбеди во неколку наврати за македонското здравство, вклучително и најновата донација од 200.070 дози на вакцини од „Фајзер“.
Европа е наша ѕвезда водилка, мотиватор за нашиот развој низ децении и векови и веруваме дека ЕУ нема да дозволи нашата надеж да згасне, изјавил Заев на средбата со претседателот Дуда.
Во тој контекст, се вели во соопштението, заеднички било констатирано дека проширувањето на Европската Унија мора да продолжи, изразено преку почеток на преговорите на Северна Македонија, бидејќи со тоа ќе се потврди дека европскиот проект е жив и атрактивен, особено за земјите како Северна Македонија кои ги спроведуваат сите потребни реформи.
По Брегзит, проширувањето на Европската Унија е особено важно за да се обезбедат нов ентузијазам, нови можности, нов развој и нов економски пазар, се согласија Заев и Дуда, стои во соопштението од владината прес-служба.
На средбата, исто така, била истакната блискоста меѓу полскиот и македонскиот народ и меѓу сите граѓани на двете земји, а премиерот Заев и претседателот Дуда потенцирале дека постојат одлични услови за натамошен развој на соработката меѓу Северна Македонија и Полска, особено во сферата на економијата и туризмот.