Најбогатите во државата треба да понесат најголем дел од товарот на економската криза што е последица на коронавирусот, порача лидерот на СДСМ, Зоран Заев во денешното гостување на „Утрински брифинг“ во „Слободна ТВ“.
„Државата е во драстичен пад на приходите кои на почетокот на април се очекува да бидат меѓу 30 до 40 отсто. Граѓаните се дома и не трошат, не работат објектите, транспортот е преполовен, не се движиме, не се плаќаат ниту сметки. Голем дел на производствените капацитети се затворени или хибернираат, затоа не се плаќа и данок кон државата. И ако за тоа не го подготвиме нашиот народ, тогаш сме голи популисти и само бркаме политички поени. Кратењето мора да се случува од секаде затоа што 60 отсто помалку приход значи недостаток за финансирање на сите расходи. И да најдеме други пари, пак мора да кратиме од дома. И да се шири гол популизам не е во ред. Големите земји ги земаа парите и сега има се помалку пари, но се надевам дека ќе најдеме евтини пари и треба чесно да кажеме дека мора да кратиме. Колку побрзо носиме храбри одлуки за солидарност, толку побрзо ќе излеземе од тешката економска криза“, изјави Заев.
Тој се осврна и на предлогот на СДСМ за кратење на платите што, како што рече, бил погрешно сфатен и изваден од контекст. Притоа истакна дека тоа е само предлог што не значи дека ќе биде прифатен од Владата.
„Владата треба да ги слушне мислењата на сите партии и на експертите. Излегов да соопштам мерки кои значат и мерки за штедење и не очекувам да бидат сите прифатени. Предложените мерките произлегоа по консултации со многу експерти, но одлуката е на Владата. И ние се бориме на пазарот на гласови, но кога доаѓа тешко време некој треба да соопшти и непопуларни мерки. Жалам што дебатата се насочи кон намалувањето на платите на администрацијата. Главниот пакет беше како да и се помогне на економијата. Самиот пакет на мерки се основа на кратењето на непродуктивните трошоци на Владата. Првиот чекор е кратењето на непродуктивните трошења, вториот е заштеда преку огромните трошоци кои одат на плата“, вели лидерот на СДСМ.
Заев зборуваше и за 29 годишниот пат на државата кон Европската Унија и НАТО. Ако беше лесно, рече тој, во изминатиот период се ќе беше решено, но проблемот беше горчлив и бараше решение.
„Со решавањето на проблемот со Грција го сочувавме македонскиот идентитет, македонскиот јазик, сега сме признаени од сите. Не беше лесно, пратениците што гласаа беа изложени на силен притисок и затоа денеска треба да се радуваме на плодовите од тоа семе што го посадивме. Двете најголеми стратешки цели на државата, НАТО и ЕУ ги исполни овој парламентарен состав, оваа Влада и верувам дека тоа го заслуживме“, изјави претседателот на СДСМ.
Тој порача дека Европа, конечно, ја исправи својата историска грешка и големата неправда кон нас.
„Сега, едногласно, во време на тешка здравствена криза, канцеларии под изолации, премиери во изолации во такви околности министерскиот Совет се собра, ја донесе одлуката јас верувам дека ќе биде верификувана и од Европскиот совет и дека наскоро ќе се одржи првата меѓувладина седница“, порача Заев.
Лидерот на СДСМ упати честитка до граѓаните и до сите институции кои покажаа доблест за две и пол години да ги спроведат реформите и светот тоа да го препознае и да станеме полноправна членка на НАТО и да добиеме безусловен почеток на преговорите со ЕУ.
„Одлуката на Советот за општи работи на ЕУ за безусловно почнување на преговори доаѓа во тешка состојба, но треба да се радуваме, зашто и радоста е лек. Обезбедивме извесност и иднина за нашата земја и за нашите деца, носејќи тешки и храбри одлуки“, истакна Заев.
Жалам, рече тој, што опозицијата не се израдува и не излезе да го честита почетокот на преговорите со ЕУ.
„Ова е борба што ја воделе сите генерации граѓани, сите политичари, сите влади. Ова е процес кој почна со потпишување на Договорот за стабилизација и асоцијација со ЕУ, па потоа продолжи кога добивме кандидтатски статус во 2005 година и сега ја дочекавме одлуката за почеток на преговорите. Искрено, очекував и опозицијата да се израдува и да честита“, рече Заев.
Меѓу другото, тој изрази надеж дека до 2024 година, 80 отсто од поглавјата со Европската Унија ќе бидат отворени, а голем дел од нив и затворени, за што побара поддршка за искористување на сите ресурси кои ги има државата но и носење на храбри одлуки.