Домашната компанија со меѓународно реноме „Еколог“ од Тетово, шведска ИКЕА и американската „Блекстон“ се трите компании што ги наброја лидерот на СДСМ, Зоран Заев во синоќешниот ТВ дуел со претседателот на ВМРО-ДПМНЕ, Христијан Мицкоски, кои ќе инвестираат во земјава по 15 јули. И лидерот на опозицијата, како бројка, истакна три компании за кои рече дека ќе инвестираат во првите 100 дена од мандатот на новата влада. Ги опиша како големи и мултинационални, но остана дискретен без да ги наведе нивните имиња, ниту, пак, дејноста со која се занимаваат.
„Еколог“, според Заев ќе инвестира околу 300 милиони евра врз основа на Законот за стратешки инвестиции. На чело на компанијата е Лазим Дестани, човекот за кој дел од медиумите шпекулираа дека ќе биде кандидат на ДУИ за прв премиер Албанец. Компанијата со седиште во Тетово веќе неколку сезони е главен спонзор на фудбалскиот клуб Шкендија.
Домашната компанија „Еколог“, според Заев ќе инвестира околу 300 милиони евра врз основа на Законот за стратешки инвеститор, за што повикот уште трае.
Лидерот на владеачката партија ја посочи и ИКЕА како инвеститор во Македонија во наредниот период. За шведскиот бренд рече дека ќе инвестира во наредните четири години, без притоа да спомене сума.
За „Блекстоун“, Заев рече дека ќе инвестира во т.н. драјпорт меѓу Велес и Демир Капија, односно индустриска зона за менаџирање на сите стоки од солунското пристаниште од Солун која ќе биде примамлива поради поевтиниот складиштен простор. Драјпорт или пристаниште „на суво“ е внатрешен интермодален терминал, директно поврзан со пат или железница до морско пристаниште и функционира како центар за претовар на товарот до внатрешните дестинации.
Во контекст на инвестициите, Заев го спомена и „Фреш фуд“, партнер на КФЦ, компанија за која истакна дека „во 10 града прави вкупни инвестиции од над 100 милиони евра во производство на домашно македонско пиле“.
Мицкоски возврати дека во првите 100 дена по преземање на власта ветува три големи мултинационални инвестиции, но, како што нагласи, имињата на компаниите ќе ги соопшти на првиот ден како премиер.
„Три компании ќе донесат одлука да инвестираат во Македонија во првите 100 дена по промената на власта. Нивните имиња ќе ги откријам на првиот ден во експозето што ќе го дадам како премиер. Засега можам да кажам дека тоа се сериозни мултинационални компании што ќе инвестираат сериозен капитал во земјава“, рече Мицкоски.