Премиерот Зоран Заев изјави дека на седниците на Извршниот и на Централниот одбор на СДСМ в петок ќе се разговара за сите политички прашања, ќе се направи рекапитулар на годината, ќе се разгледаат и односите со сите во коалицијата, потенцирајќи дека таа донела големи одлуки за државата. Пред средината на февруари следната година, како што вели, нема да се прават договори за заеднички настап на предвремените парламентарни избори што се закажани за 12 април.
„В петок ќе имаме Извршен и Централен одбор на кои ќе ги разгледаме сите политички прашања и ќе направиме рекапитулар на годината. Коалициски договори, спогодби или договори за заеднички настап пред изборите од било каков карактер не верувам дека ќе се прават пред средината на февруари поради тоа што кандидатските листи, според роковникот, ако не се лажам се поднесуваат некаде до 12 март. Имајќи го тоа во предвид ќе ги искористиме сите можности што ни се на располагање за подобро да се позиционираме пред граѓаните во пресрет на претстојните предвремени парламентарни избори“, изјави Заев.
Прашан дали во партијата е отворена темата за коалицијата со ДУИ, премиерот рече дека ќе ги разгледаат односите со сите и посочи дека и јавно ги коментираат таквите односи, кога, како што вели, ни се случуваат некои непријатни чувства.
„Оваа владина коалиција ги донесе големите одлуки за државата. Довербата е голема и верувам дека сето тоа коалицијата на чело со СДСМ ја прави извесно победничка опција која што ќе ги почитува гласовите на сите граѓани, рече Заев.
Зоран Заев ќе се повлече од функцијата премиер во Владата на 3 јануари согласно договорот за техничка Влада на 100 дена пред избори.