Премиерот Зоран Заев во интервју за австрискиот весник „Стандард“ на прашањето за бугарското вето на пристапните преговори за Северна Македонија во ЕУ и можниот излез од оваа ситуација, изјави дека разговорите со нашиот сосед продолжуваат и оти, според него, направени се чекори поблиску до решение.
Мислам дека е можно да се постигне придвижување пред Божиќ, односно на Советот на ЕУ на 22 декември, бидејќи Бугарија до тогаш ќе избере нов парламент на 14 ноември, а вториот круг од претседателските избори таму ќе се одржи една недела подоцна. Така што, тие имаат повеќе од еден месец да донесат одлука. Министрите за надворешни работи напорно работат на тоа. Ние се обидуваме да ја разбереме позицијата на Бугарија и тие се обидуваат да ја разберат нашата позиција, истакнува претседателот на Владата Заев во интервју за виенски „Стандард“, се посочува во соопштението од владината прес-служба.
Премиерот Заев подвлече дека овој процес е билатерална работа, дека во него ЕУ е наш заеднички пријател и дека имаме целосна доверба во европските институции.