Францускиот претседател Емануел Макрон изјави дека Владимир Путин направил огромна грешка со повлекувањето од важниот договор за жито. Зборувајќи денеска пред новинарите во Брисел, Макрон истакна дека со учеството во договорот, Русија преземала огромна одговорност кон многу земји, објави агенцијата Анадолија.
Африканските земји, Блискиот Исток, дури и азиските земји се многу зависни од овој договор. За оние кои сè уште се сомневаа во искреноста и посветеноста на Путин за општото добро, одговорот е многу јасен – тој одлучи да ја претвори храната во оружје, рече Макрон, додавајќи дека станува збор за огромна грешка.
Тој нагласи дека Франција има одговорност да го олесни извозот на жито и ѓубрива како дел од земјоделската иницијатива што ја започна минатата година за поддршка на земјите кои се борат со проблеми со безбедноста на храната, пишува Си-Ен-Ен.
Одлуката на Русија да се повлече од договорот за извоз на жито од Црното Море поддржан од ОН претставува „ескалација на користењето на гладот како оружје“, соопшти денеска Канада, осудувајќи го повлекувањето на Москва од пактот.
Во соопштението, канадската Влада наведе дека „ова е сериозна ескалација на употребата на гладот како оружје од страна на Руската Федерација, која претходно ја попречуваше работата на Црноморската иницијатива за жито (БСГИ). Канада ја повикува Руската Федерација веднаш да го обнови своето учество во договорот со цел да се избегнат дополнителни шокови за глобалните системи за храна, што се веќе оптоварени од нејзината агресивна војна против Украина“.
Русија во текот на ноќта лансираше серија беспилотни летала и ракети кон црноморските пристаништа од каде се извезуваат огромни количества жито на светските пазари. Нападите се случија неколку часа откако пропадна црноморскиот договор за жито, а Русија на полноќ се повлече од договорот за гарантирање безбеден коридор за украинскиот извоз на жито.
Шефот на германската дипломатија ја обвини Русија дека фигуративно истрелала проектили врз гладните луѓе ширум светот со напад на украинското пристаниште Одеса.
Г. Т.