Новак Ѓоковиќ тргна со победа на завршниот АТП Мастерс во Лондон. Во меч од првото коло, со фантастичен пресврт, го совлада Доминик Тим со 6:7, 6:0, 6:2 што е негов четврти триумф во толку одиграни средби против австрискиот тенисер.
„Доминик одлично почна и ги заслужи овациите за големиот труд. Од почеток игравме на високо ниво, а тој го заслужи првиот сет бидејќи беше подобар во тај-брејкот“, изјави Ѓоковиќ.
Тим го доби првиот сет во тај-брејк по голема борба. Ја искористи дури седмата сет топка, а во меѓувреме мораше да спасува и една на вториот светски рекет. Ѓоковиќ во продолжение на натпреварот заигра како во старата добра форма и, иако сè уште има проблеми со рачниот зглоб, загуби само два гема. Воведното коло во групата ќе биде комплетирано вечерва (21 ч.) со дуелот меѓу Милош Раониќ и Гаел Монфис.
„Успеав да се фокусирам во продолжението и брејкот во раната фаза од вториот сет ми помогна да заиграм подобро и на крајот да победам“, додаде српскиот ас.
Ѓоковиќ во второто коло (вторник, 15 ч.) ќе игра против Гаел Монфис.
Утре на програмата се мечевите од првото коло во групата А. Од 15 часот во „О2 арена“ ќе играат Вавринка и Нишикори, во вечерниот термин (21 ч.), моментно најдобриот светски тенисер, Енди Мареј ќе се сретне со Марин Чилиќ.
Завршниот Мастерс во Лондон се игра за награден фонд од 7,5 милиони долари.